Shillong, Rymphang 10
Ka Ophis treikam ka Public Health Engineering (PHE) Mairang Division, Eastern West Khasi Hills District ha 10 tarik u Rymphang 2026, ka la pynlong ïa ka Prokram ban rakhe ïa ka Jal Arpan Diwas kaba dei shi bynta jong ka Jal Jeevan Mission, kaba la long ha Conference Hall ka Ophis PHE Pyndengumïong, Mairang.
Ha kane ka Sngi la wan ban ïadon bynta lang da u MDC ka Pariong Mawthadraishan, u Bah Powell Sohkhlet kum u Kongsan ha ryngkat ka jingdon lang ka Additional Deputy Commissioner, ka Kong VA Hynñiewta kum ka Symbud Kongsan, ka Executive Engineer PHE ka Kong R.Kynjing, u SDO PHE, u Bah S.Tariang kiwei ki Ophisar Sorkar, ki Sordar Shnong lem bad ki nongshong shnong.
Haba kren ha kane ka sngi u Bah Powell Sohkhlet u la kyntu ïa ki kontraktor ba kim dei ban shu pyrkhat tang ka ïohnong ïalade shimet hynrei ki dei ban trei bha trei hok kumba ka Sorkar ka la bynshet ha ki.
“Nga ïohi ba ki don ki kontraktor kiba pyntrei bad ki pyrkhat shuwa ïalade shimet tang ban ïohnong kin sa pynpoi pat ïa ka um. Hynrei dei ban trei hok khnang ba ki paidbah kin ïoh hok ïa ka um bam um dih,” u la ong.
U Bah Powell u la ong ruh ba ka um ka dei kaba donkam tam ha baroh ban ïoh ban pyndonkam, la ka long ha ka khlieng ne ha ka sait bad kiwei-kiwei de, da kaba kdew ruh ba ka thma bah ba lai dei ka um.
Lada ka um ka wan poi ha ki longïing ka la pynsuk eh shibun bad ka la pyllait na ka jingleit ïeng laiñ ban tongum, u la bynrap. Kumta u la ong ba lyngba jong kane ka skhim um bam um dih kan ïarap shibun eh sha baroh ki shnong ki thaw bad ym tang ba ngin ïoh ïa ka met kaba koit kaba khiah hynrei ngi dei ban da leh khuid.
Ha kane ka sngi na ka liang ka ophis ka la ïoh ruh ban aiti noh ïa ki projek sam um bam lyngba ka JJM sha ki VWSC Jong ki 10 tylli ki shnong kiba hap hapoh ka Mairang Block bad Mawthadraishan Block.
