Shillong, Rymphang 10
U Bah Adelbert Nongrum uba dei u MLA ka North Shillong Constituency u la dawa na ka Sorkar ba ka dei ban wengkam shipor ïa u Deputy Commissioner (DC) bad Superintendent of Police (SP) ka East Jaiñtia Hills hashwa ban ïaid shakhmat ka jingtohkit ïa ka jingtih dewïong beaiñ ha Thangsko.
U Bah Adelbert u la pynpaw ka jingsngewkmen ba ka Sorkar ka la thung da ka kynhun tohkit hynrei shwa ban ïaid shakhmat dei ban pynsangeh treikam ïa u DC bad SP namar kumno kim tip haba don ka jingtih dewïong beaiñ.
U la ong ba kine ki ar ngut kim dei ban kyntait ne bym tip ïa ka jingdon ka jingtih dewïong beaiñ namar u Myntri Rangbah ka Jylla u la ong ba ka jingjngai ka long tang 25 kilometre.
U la ong biang lada u nongïasaid ka Ïingbishar High Court u poi sha katei ka jaka balei ki pulit kim lap ïa ka jingdon ka jaka tih dewïong beaiñ.
Shuh shuh u la ong lada kata ka jaka kam don surok kumno la lah ban sei ïa u dewïong ban shalan beaiñ.
Kumta u la kyntu ïa ka Sorkar Jylla ba kam dei ban kren tang da ka ktien hynrei ban pyni da ki kam.
U la buh jingkylli ïa ka Jaiñtia Hills Autonomous District Council kaba dei kaba bat ïa ka khyndew ka shyiap bad ïa ka Elaka Sutnga balei ki sngap jar haba don ka jaka tih dewïong beaiñ kaba la duh ki mynsiem ba lui lui.
