Nongstoiñ, Rymphang 11
Ka kam thaiñ pla ha ka thaiñ Mulliang, West Khasi Hills ka dei kawei ka kam kaba kongsan nalor kiwei pat ki kam ïa kaba ki longkmie ki trei, ha kaba la ong ba kala long shisha kaba ai jingmyntoi kaba khraw ïa ki, khamtam ha ka por kaba ki sngew kyrduh.
La ong ba kane ka kam thaiñ jingthaiñ jong ki longkmie na Mulliang ka dei ruh kaba la ïalam lynti da ki kmie ki jong ki naduh ka por ba ki dang don ha kane ka sla pyrthei hynrei na ka liang jong ki kum ban pynsah nam ïa kaei kaba ka kmie ka jong ki kala ïalam, ki la ïai bteng bad nang pynheh shuh shuh ïa katei ka kam.
Ki ar ngut ki longkmie kiba dei ruh ki shipara ba kynthup ïa ka Kong H Pangniang bad ka Kong E Pangniang na ka shnong Tynghor ha West Khasi Hills jong ka thaiñ Mulliang haba kren bad u nongthoh khubor halor ka kam thaiñ jingthaiñ ka jong ki ha ka jingwan pyni nam ha ka Ri Mulliang Festival ïa kaba la pynlong da ka Ge Thymmei u Mulliang ha Tynghor, ki la ïathuh ba ïa katei ka kam thaiñ jingthaiñ khamtam ban thaiñ pla ki la sdang naduh ka por ba ka kmie jong ki, ka dang im ha kaba kum ki khun ruh ki hap ban bteng ïa kane ka kam.
Shuh shuh ki la ong ruh ba ka kam thaiñ pla ka dei kawei na ka riam tynrai jong ki Mulliang naduh hyndai hynthai ha kaba ki don ruh ar tylli ki jait jingthaiñ kata ka jingthaiñ ïa ka jaiñ pien kaba pyndonkam ki Garo lane ki Naga hynrei ka jingthaiñ bad kaba kham ïaid dor hi ka dei ka pla kaba baroh ki kieng.
Kitei ki longkmie ki la ïathuh ruh ba ïa u ksai ban pyndonkam ban thaiñ la thied na ki briew na Assam, bad ïa kine ki pla la pynpoi shaduh sha Shillong bad kylleng ki jaka jong ka Jylla, bad ki la ïathuh ruh ba kaba kham ïaid ka dei ha ka por ba pynlong ïa ka jingïaseng Synod Syllok ki pastor haba na ka liang jong ki, ki la ïoh ban thaiñ ïa ki pla bad ai ïa ki pastor baroh kat kiba poi sha ka jingïaseng.
Shuh shuh ki la ong ruh ba ki don ïa ka jingthmu ban nangpynroi bad nangkyntiew bad ban pynïaid ïew ïa katei ka kam thaiñ jingthaiñ.
Nangta, ki la ong ruh ba kumba long mynta kila don ruh ïa ka seng thaiñ kaba la buh hapoh ka shnong ïa kaba la tip kum ka ‘Pla Mulliang” bad la hikai ruh ïa kiwei kiwei bad ha ka shisngi la lah ban pyndep tang kawei ka pla bad ka dor jong kawei ka pla ynda la dep thaiñ ka long hynñiew spah kawei.
Ki la ïathuh ba naduh ba kha ïa ki ka la poi kumba 40 snem kaba ki tip ban thaiñ bad haba ki thaiñ ka don hi ka jingmyntoi namar ba ha kano kano ka por ba ki sngew kyrduh ki la don ki nongphah lane kiba donkam, kumta ki la thaiñ na ka bynta jong ki bad ki la pyrshang ban pynïaid ïew sha kine ki thaiñ Mulliang kiba donkam ïa ki pla.
Ki longkmie ki la ong ruh ba naduh ba la sdang ïa ka kam ban thaiñ ki la ïoh katto katne ki jingïarap kum ïa u ksai, tangba u ksai kaba ki ïoh um da bha kum u ksai kaba ki shu thied na ïew Assam.
“Kane ka jingthaiñ pla ka long kaba kongsan ïa ngi kum ki nongshong shnong ka thaiñ Mulliang bad ngi kyntu ruh ïa ki para kynthei bad ki para longkmie ba kin pynsah ïa katei ka thaiñ ba kan long haduh ki khun ki ksew ki pateng ki jong ngi,” ong kitei ki longkmie.
Shuh shuh ki la bynrap ruh ba ka long kaba jynjar hi ban trei ïa katei ka kam thaiñ jingthaiñ namar ki pyndonkam beit tang da ki tiar siej kiba mih na la ka jong ka shnong.
