Shillong, Rymphang 11
Ki nongtrei Muster Roll jong ka Jylla kiba don hapoh ka shatri ka All Jaiñtia Muster Roll Workers & Labour Union (AJMRWLU) ha ka sngi Ba-ar ki la byrngem ban mih surok namar ka jingkuman ka Sorkar haba ïadei kiba bun ki mat jingdawa jong ki.
Ki nongtrei Muster Roll naduh ki snem ba la dep ki la dawa na ka Sorkar ban pynkiew ïa ka Variable Dearness Allowance (VDA) bad ban ithuh ïa ka rta shongthait ki nongtrei Muster Roll hapoh ka Jylla.
Ki la dawa na u Myntri Rangbah ka Jylla Conrad K Sangma ban khot ïakren halor ki mat jingdawa lada ka Sorkar kam kwah ba kin mih surok ban ïakhih.
Haba kren sha ki nongthoh khubor u nongaibuit jong ka Joint Action Committee (JAC) ka AJMRWLU u Bah Khroo L Pariat u la ïathuh ba ka Union ka la phah haduh 5 tylli ki dorkhas sha u Myntri Rangbah, hynrei haduh mynta kam pat ïoh kano-kano ka jubab haba ïadei ki jingdawa. Katba ki la ïoh ktien na u Myntri Rangbah ba ki dei ban long kiba ïaishah.
U la kynnoh ba ka Sorkar Jylla haduh mynta kam pat pyntreikam ïa ka Labour Code 2025, ka ban ai jingmyntoi ïa ki Muster Roll bad ïa ki nongtrei bylla sngi hapoh ka Jylla. U Bah Pariat u la ong, “Ngi sngew lyngngoh ba naduh u Naiwieng 2025, ka Sorkar Jylla Meghalaya kam shym la ai kano-kano ka jingpynbna ban pyntreikam ïa ka Labour Code ha Meghalaya.”
U Bah Pariat u la ban jur ba ka jingbym leh eiei jong ka Sorkar ka ktah ïa ka jingim jong ki nongtrei Muster Roll, kiba ïakhun pyrshah ïa ka jingkiewdor jong ki marbam mar dih hapoh ka Jylla.
Ka AJMRWLU ka pynpaw ruh ïa ka jingsngewkhia halor ka jingbym pyntreikam ka Sorkar Jylla ïa ka Employee Provident Fund (EPF) bad ka jingbym lum jingkheiñ ïa ka dor jong ki marbam mardih watla ka Sorkar India ka la pynhïar dor ïa ka GST ha ki marbam.
