Florida, Rymphang:
Uwei u tymmen 64 snem u la shah rai pyniap halor ka jingpyniap ia uwei u nongdie ‘salesman’ hapdeng ka jingleit jong u bad ia une u runar la rai pyniap ha ka Sngi Ba-ar da kaba shim noh ia ka jingim jong u da ka rukom pyniap kaba shu injek da ki dawai pyniohthiah iap syndon ia u ha ka jaka ba la set ia u hapoh ka nongbah Florida. Ha kajuh ruh ka por la ong ba kane ka long ka sienjam ba nyngkong eh ia katei ka nongbah ba kan shim ia katei ka rai ha une u snem 2026. U Ronald Heath, uba la shah set patok shi snem na ka bynta kawei pat ka kam pyniap briew kaba u la leh ha ka por ba u dang 16 snem ka rta, un shah pyniap ha ka por 6:00 baje janmiet ha ka patok ba la set ia u ha Raiford hapoh ka nongbah Florida. U Heath, u la shah rai pynrem halor ka jingpyniap ia u Michael Sheridan, ha u snem 1989, ha ka por ba u ia leh ia katei ka kam thombor ryngkat bad u para jong u, u Kenneth Heath.
U Kenneth Heath u la kam ba u la pyniap briew bad u la ai sakhi pyrshah ia u hynmen jong u. Ha kaba la rai pynrem ia u pat da kaba set patok ia u baroh shi jingim.
Ka kynhun bishar ka la lap ba “U Ronald Heath u dei uba don kti bun eh ha ka jingpyniap bad jinglute bad ialam bakla ruh ia u para jong u uba kham rit, u Kenneth,” katkum ki kot ki sla jong ka iingbishar.
Ka jingshah pyniap jong u Sheridan, ka la jia tang katto katne bnai, hadien ba u Ronald Heath, u la lait na patok, hadien ba u la shah set patok haduh 10 seem lynter, na ka jingshah set phatok, kaba 30 snem, na ka bynta katei ka kam pyniap briew, kaba u la leh ha ka por ba u dang samla.
Kane ka jingshah pyniap kan long kaba ar ha ka ri America hapoh jong une u snem 2026.
Uwei u briew uba la shah rai pynrem namar ka jingpyniap ia ka samla barim jong u bad u samla jongka, u la shah pyniap noh da kaba shim da katei hi kajuh ka rukom pynshitom ban shu pyniap da kaba ai da ka injek pyniap briew bad la pynshitom ia u hapoh ka nongbah Texas ha u bnai ba la dep.
Ki don 47 ngut ki jingshah pyniap ha America ha u snem ba la dep, kaba bun tam naduh u snem 2009, ha kaba la pyniap ia 52ngut ki koidi.
Ka Florida, ka la pynlong ïa ka jingpynïap kaba bun eh ha u snem 2025 — 19 ngut — bud sa ka Alabama, South Carolina bad Texas, ha kaba ki don 5 ngut kawei kawei.
Shuh- shuh ruh la ong ba 39 ngut kiwe pat pat ki dei kiba la shah rai pyniap ha u snem ba la dep bad kiba la shah pynngat ha katei hi kajuh ka jingpynshitom da kaba shu ai da ka tika pyniap briew.
Hynrei la ong ba ka United Nations ka la pynrem haba iadei bad katei ka jait jingpynshitom bad ong ba ka jing pyndonkam ia ka ‘nitrogen gas’ kum ka rukom pynshitom iap, ka long kaba sniew bad kaba khlem-akor.
U President Donald Trump u dei u nongkyrshan ia katei ka jait jingpynshitom pyniap bad u la kyntu ruh ban pyniar ia katei ka rukom pynshitom naka bynta kiba bun ki nongleh kam sniew bad ki riew thombor ha katei ka ri.
