Shillong, Rymphang 11
U District Magistrate jong ka East Jaiñtia Hills District u Manish Kumar ha ka sngi Balang, u la hukum ban pynpra noh ïa baroh ki crane hiar par (lifting crane) bad kiwei ki machine kiba don ha ki par dewïong ha Mynsngat-Thangsko, hadien ka jingbthei ka par ba wanrah ïa ka jingïap ki 31 ngut ki nongbylla.
Ïa kane ka hukum la pynmih hapoh ka kyndon 152 jong ka Bharatiya Nagarik Suraksha Sanhita (BNSS), 2023, kaba shah ban pynpra ïa baroh ki jingshna beaiñ, kynthup ki crane sei dewïong bad ki dara, na ka jaka ba bthei ka par dang shen.
“Kine ki crane bad kiwei kila pynthut ïa ki paidbah bad ki long kiba ma ïa u paidbah,” ong ka hukum haba bynrap ba kine ki tiar, ki dei kiba lah ban pyndonkam ha ka jingtih dewïong beaiñ, ïa kaba la khang da ka National Green Tribunal naduh u snem 2014.
Ïa kane ka jingpynpra yn sa leh hapoh ka jingpeit jong u Investigating Officer, u ban sa buh jingthoh bha lem bad ban leh ïa ka ‘geo tagging’ ïa ka jaka.
U District Magistrate u la bthah ïa u Superintendent of Police ban pynthikna ba kane ka hukum kan treikam noh mardor.
