Shillong, Rymphang
Ka jingpynkheh ïa ka Lympung ba 6 jong ki Khun Samla ka Sengkhihlang (Seng Khasi Seiñ Raij) ka ban long ha ka 14 bad 15 tarik Rumphang, 2026 ha ka shnong Wahnongkseh (Sohiong Circle) ka la ïaid shaid shaid.
Ki nongkitkam jong ka seng ki Khun Samla ka Sengkhihlang ha ka sngi u Blei ka 8 tarik Rymphang, 2026 ki la hiar ban pynlong ïa ka jingjurip ïa ka jaka ba la pynkhreh ban pynlong ïa ka Lympung ba 6 jong ka seng ha ka shnong Wahnongkseh. Haba ai jingkren na ka liang u President ki Khun Samla ka Sengkhihlang, u samla Kyrpad Syrti u la khot la wer ïa ki khun samla, ki longkmie longkpa, ki ma ki woh kiba don ha ka ka Niam Khasi Niamtre ba kin wan ban shim bynta shit rhem sha kane ka Lympung ki Khun Samla, u la ai khublei ruh ïa ki tnad treikam jong ka Sorkar kiba la shimkhia ban pynbit pynbiang ïa ki jingdonkam baroh.
Shuh-shuh u President ka Seng Khasi Thaiñ Nongkseh, u Rangbah Kampar Shabong u la pynpaw ba na ka liang ka Seng Khasi Thaiñ Nongkseh ka la trei shitom ban pynbit pynbiang ïa ka jingpynkheh na ka bynta kane ka Lympung bad u la kyntu ïa ki para-kur ki para-kha na sawdong ka Ri ki Lai Phew Syiem, Khatar Doloi ban wan shim bynta sha kane ka Lympung khnang ba kan long kaba iphuh i phieng. U la kyntu ruh ïa ki nongleit sha katei ka lympung ba kin bud ryntih ïa ka jingpynïaid kali ha surok ban poi sha ka lympung namar ka surok ka long kaba rit. Ka Seng Khasi Thaiñ Nongkseh ka la dep ban pynbeit bad buh da ka por ïa ka jingwan jingmih jongki kali sha kane ka Lympung namar ka jingrit.
U la kyntu ruh ïa ki ba don jingthmu ban wan die jingdie ba kin ïakynduh ïa ki nongïalam ka Seng Khnang ba kin lah ban batai ka ka jaka bad pynpaw ba ka seng kan ym shah ïa ki bar Jylla ban wan ban die jingdie ha ka jaka ban long ka lympung.
