Shillong, Rymphang 11
Kawei ka longkmie kaba la 63 snem ka rta ka la sdang ban kamai jakpoh namar ka jingtuid ki briew na kylleng ki jaka ban wan bam ïa ka doh snier syrwa masi kaba la shong harud surok ha shnong Umphyrnai ka lynti ban leit sha Smit, East Khasi Hills District. Kane ka longkmie ka dei kaba la tip kyrteng kum ka Kong Meldalin Myrboh kaba shong ba sah ha Lumkharkongor, Umphyrnai kaba la shong dukan da kaba ker tang da ka plastic bad phai dadien ïa ka surok.
Ka jingphai dadien ïa ka surok ka dei namar ka jingkhlaiñ palat ka lyer kaba la beh hynrei ki paidbah kiba la tip bad bna ïa kane ka dukan ki la tuid ban leit bam syrwa namar ka jingbang bad ka jingshngiam ka syrwa masi. Ban tip kham bniah na kaei ka daw ba ki paidbah ki tuid ban bam doh snier syrwa, U Nongsaiñ Hima u la ïoh ban ïakren kyrpang bad ka Kong Meldalin Myrboh kaba la ïathuh ba nyngkong ka dei kaba die dohkha ha ïew Laitumkhrah hynrei namar ym don ba peit ïa ka kmie bad u kpa haba ki la tymmen ka la wan noh sha shnong.
Ka la ïathuh haba ka la shong ha ïing kam donkam, kumta ka la pyrshang ban die noh da ka doh snier syrwa masi, dohjem, doh thylliej masi bad shana kaba la ïaid mynta la ar snem. Ka la ïathuh ba ka die ïa ka dohsnier sanphew tyngka ha ka shi bowl hynrei suki suki ki briew kiba ïaid lynti ki la sdang ïohi bad biang bha ka jaka ïeng kali ki la sdang ban wan bam bad bna kylleng ki jaka.
Shuh shuh ka la ïathuh ba kiba wan bam doh ki long naduh Shillong, Nongpoh, Mairang bad ki thaiñ Mawkynrew bad ki nongjngohkai pyrthei ruh haba ki leitkai sha Laitlum.
Ka la ïathuh biang ba mynta ka dohsnier ka ju die kumba hynriew kilo ha ka shi sngi da kaba sdang ban die naduh 3;00 baje janmiet haduh ban da lut ka doh.
