Shillong, Rymphang 11
Ki pulit jong ka Meghalaya ki la kem sa ïa ki ar ngut ki briew ba kynthup ïa u trai jong ka par bad u nongpynïaid, ha kaba ïadei bad ka jingjia jong ka jingbthei ka par dewïong beaiñ kaba dang shen, kaba la shim ïa ka jingim jong palat 30 ngut ki nongbylla ha East Jaiñtia Hills district.
Ki ar ngut kiba la shah kem, ki dei kiba la tip kyrteng kum u Process Dkhar na Sutnga bad u Tensing Suchiang na ka shnong Umlawang.
“Ngi la kem sa ïa ki ar ngut. Uwei u dei u trai jong ka par bad uwei pat u dei u nongpynïaid ïa ka kam tih dewïong beaiñ,” la ong u Superintendent of Police (SP) Vikash Kumar.
Kham hashwa, ki pulit ki la kem ïa ki ar ngut ki trai par kata u Forme Chyrmang (36) na ka shnong Jalaphet Pordung bad u Shamehi War (42) na Sutnga Pohwaiolong, kiba la shah set along 14 sngi hapoh ka Judicial Custody.
Halor katei ka jingjia, ki pulit ki dang pynlong ka jingtohkit ban lap shuh ïa kiba donkti ha kane ka kam beaiñ, kynthup ruh ïa ki nongbei pisa bad ki nongpynkit ïa u dewïong.
Ka National Green Tribunal (NGT) ka la khang ïa ka jingtih dewïong thliew khnai (rat-hole mining) ha Meghalaya ha u snem 2014 namar ba ka buh jingma ïa ka mariang bad ruh ïa ka jingshngaiñ.
