Shillong, Rymphang 11
Ka jingïap jong ki nongbylla tih dewïong na ka jingbthei ka par beaiñ ha Mynsngat-Thangsko, East Jaiñtia Hills ha ka 5 tarik Rymphang, kala kiew sha ka 31 ngut bad kiba mynsaw kila kot ïa ka 10 ngut.
“Ka jingïap jong ki nongbylla ka la kiew sha ka 31 ngut bad 10 ngut kiba la mynsaw,” la ong ka kyrwoh ba la pyllait da ka Meghalaya State Disaster Management Authority (MSDMA) ha ka sngi Balang.
Ha ka 9 tarik Rymphang, ka Sorkar Jylla ka la pynsangeh noh ïa ka jingwad bniah bad pyllait ha ka jaka ba la don ka jingbthei ka par tih dewïong beaiñ. U Deputy Commissioner ka District u Manish Kumar u la ong ba ïa ka kam jong ka jingwad bniah la pynkut noh ha ka por 5 baje janmiet jong ka sngi Nyngkong hadien ba ka kynhun kaba khmih bniah ka la pynkut da kaba ong ba ym don shuh ka lad ban dang lap ïa ki briew ba sahkut hapoh ka par. Ka Sorkar Jylla kala hukum ban pynlong da ka Judicial Inquiry halor kane ka jingjia ban pynthikna ïa ki daw kaba lam sha kane ka jingbthei nalor ban tynrong ïa ka jingbahkhlieh. Ka ïingbishar Meghalaya High Court kala khot hajir ïa u Deputy Commissioner bad u Superintendent of Police ka East Jaiñtia Hills haba pan ïa ki jingtip ba bniah halor ki kam ba kila leh halor kane ka jingjia, ka jingkem ïa ki briew ba donkti bad ka jingkurup ïa ki tiar tih par bad kiwei kiwei.
