Nongpoh, Rymphang 11
Ka Civil Hospital Nongpoh ka dei kawei na ki jaka ai jingsumar kaba la shakri shikatdei na ka bynta jong ki paidbah ka thaiñ Ri Bhoi, hynrei kumba long mynta kane ka jaka ai jingsumar kaba la kyntiew kyrdan na ka CHC sha ka Civil Hospital ha ka 7 tarik Nohprah, 2004 ka dang don ïa bun ki jingduna bad kam pat lah satia ban ai ïa ka jingsumar kaba paka sha ki paidbah.
Ïa kine ki jingduna la lap ha ka jingleit kynduh ka HNYF ïa ki bor ba dei khmih ka hospital ha ka sngi Balang, ha kaba la shem ba ka Trauma Centre ka dang treikam tang na ka bynta kiba mynsaw malu mala lane tang kumba 60 persen, ka jingbym biang snam ha ka Blood Bank, ka jingbym don ki jaka sumar kyrpang na ka bynta ki koidi bad ruh ka jingbym don jong ka Intensive Care Unit (ICU).
U Bah Donroi Kshiar, Education Secretary ka HNYF Northern Region haba kren sha ki lad pathai khubor ha ka jingdon lang jong kiwei ki dkhot ka seng, u la pynpaw ba ïa kine ki jingduna la ïoh jingtip lyngba ka jingïathuh jong ki bor ba dei khmih kane ka hospital ha ka jingkynduh bad ki nongïalam seng.
Shuh shuh, utei u nongïalam u la kyntu ïa ka sorkar jylla ba kan shimkhia ban pyntreikam noh 100 persen ïa ka Trauma Centre, ban phiah la ka jong ka jaka sumar ïa ki koidi bad ruh ban thaw noh ïa ka ICU ruh ha kane ka jaka ai jingsumar na ka bynta ka jingmyntoi jong ki paidbah nongleit shah sumar.
Ha kaba ïadei bad ka Blood Bank pat, ki bor ka hospital kila pyntip ba ka jingduna snam kaba la pynlong ba bunsien ïa ki nongpang kiba donkam kyrkieh kim ju ïoh snam, ka dei namar ka jingduna palat jong ki briew kiba leit noh synñiang snam ha kane ka jaka. Kumta ka seng ka kyntu ïa ki paidbah ba kin leit ban ai snam kylluid mynsiem ban pynim pat ïa ki mynsiem briew kiba donkam snam kyrkieh.
Shuh shuh, ban pynurlong ïa kine ki mat jingduna jong kane ka jaka ai jingsumar, ka seng ka la kyntu ruh ïa baroh ki nongmihkhmat ka Ri Bhoi District ba kin shimkhia bad ka Sorkar Jylla ban ïakren bad pynthikna ba kine ki jingduna baroh kin lah ban urlong kham kloi na ka bynta ka jingmyntoi bad ka bha ka miat jong ki paidbah ka thaiñ hi baroh kawei.
