Shillong, Rymphang 11
Namar ki rit paid kiba don palat sanphew tylli ki jaidbynriew ha Bangladesh kim don jingshngaiñ, kumta ki kwah ba kano kano ka seng saiñpyrthei kan shim ïa ka jingkular hashwa ba kin leit ban thep vote lashai ka sngi ka 12 tarik Rymphang 2026.
Ban tip kham bniah ïa ka sngi thep vote ha Bangladesh, la ïoh ban ïakren bad u Bah Andrew Sohlamar uba dei u Organising Secretary ka Bangladesh Indigenous People Forum uba don jingkyrmen ba ka Sorkar ba thymmai ban synshar ïa ka ri Bangladesh kan don ka jingïadei kaba jan bad ka ri India khnang ban kyntiew biang ïa ka ïoh ka kot bad ban wanrah ïa ka shongsuk shongshngaiñ.
U Bah Andrew u la ïathuh ba ka jingthep vote ha Bangladesh kan long lashai ka sngi ka 12 tarik Rymphang ha kaba la dep ai shuti bad la khang lut ïa ki kali bad ki thuk thuk ba kin ïaid khnang ba kane ka ilekshon kan long kaba jai jai. U la ïathuh ba ki jaidbynriew rit paid ha Bangladesh kiba don palat 50 tylli kynthup ïa ki Khasi ki dawa na ki seng saiñpyrthei ba kin ai jingshngaiñ ïa ki shwa ka ilekshon bad hadien ka ilekshon.
U la ïathuh ba dei tang ka BNP kaba la kular ban ai jingshngaiñ ïa ki rit paid ha kane ka ilekshon.
U la pyntip ba ïa ka Awami League kaba lamkhmat da ka Sheik Hasina kam lah ban ïakhun ilekshon namar ba la shah khang ha ka Sorkar u Yunus hynrei ym tip shaei ki nongkyrshan jong ka kin leit kyrshan.
“Katkum ka jingsngewthuh jong nga, ka Bangladesh kam lah ban kyrshan da lade khlem ka India kin hap ban plie lynti ban pynïadei bad ka India,” u la ong.
U la ïathuh ruh ba ka jingeh mynta ka dei namar ka India ka la pyrkhing ruh ïa ka Visa, ka la pyrkhing bun jait ki kam bad ka la hiar ruh ka khaïi ka pateng naduh ba kam don shuh ka jingïadei bad ka India.
Kumta u don jingkyrmen ba kano kano ka Sorkar kaba synshar ïa ka Bangladesh kan don biang ka jingïadei khnang ban wanrah biang ïa ka shongsuk shongsain bad kyntiew biang ïa ka ïoh ka kot ha Bangladesh.
Kumban shu pynkynmaw, ka jingbym don shuh ka jingïadei hapdeng ka ri India bad Bangladesh kadei naduh ba la khyllem ka Myntri Rangbah barim ka Sheik Hasina bad la thung ïa u Muhammad Yunus kum u Chief Adviser ban synshar ïa ka ri Bangladesh naduh ka 8 tarik Nailar, 2024.
