Ki samla ki don ka bynta ka bakhraw ha ka imlang ka sahlang, ban tei ïa ka ri bad ka jaitbynriew, ban long ki khlur bad ki nongïalam, bad ban wanrah ïa ki jingkylla na ka bynta ka jingbha. Ka Ri ka bym ai ïa ka jingshaniah ha ki samla, ka dei lypa ka Ri kaba buh ïalade ha ki jingeh kiba bun. Bad ki samla kiba randien ban ïashim bynta ha ka kit ka bah ïa ki jingeh jong ka ri, ki dei ki khawpud bad ki bym don ïa ka jingkitkhlieh na ka bynta ka lawei. Ka saiñpyrthei ka dei kawei na ki shlem ba kiba bun na ki khun samla kim ju kham sngewtynnad than ban ïakren ne ïashim bynta. Ki sngew ba ka dei ka kam jaboh. Kata ka jingsngew kam dei kaba bakla haduh katta katta. Tangba dei ban kynmaw pat ba ka saiñ hima sima ym dei satia kaba shu jaboh hi kumto. Dei ki briew kiba don hangto kiba pynjaboh bad ka jingjakhlia ka nang jur bad shyrkhei namar ki briew kiba don ïa ki jingthmu ba bha na ka bynta ka ri, ki Randien. Namarkata, pynkhreh samla ban wanrah ïa ki jingkylla na ka bynta ka jingbha bad ka jingmyntoilang.
Watla ka ilekshon jied nongmihkhmat sha ïingdorbar thawaiñ ka dang sah sa kumba ar snem, kata ka ban long ha u snem 2028, kum ki samla ki dei ban mih lypa shakhmat ban pynkhreh ïalade. La sngewdei ban kyntu bad ai mynsiem ïa ki samla samhoi ba kin ïa mih shakhmat ban ïa aireng. Ka don ka jingïakren ba hana khlem pisa, ym lah ban jop ilekshon. Kane ka long kaba bakla. Hooid, donkam pisa ban pynlut haba ïaid ba ïeng sha ki shnong ki thaw lane ban ai sha ai dud ïa ki nongkyrshan bad ki paidbah. Hynrei ban kam pat ba tang da ka spah la jop lypa, ka long kaba bakla.
Ka jingong ba ki briew ki biej pisa, kam da dei than eh. Hooid ki don kiba kwah pisa hashwa ba kin leit thep ‘vote’ bad ki pan beit markhmat na ki kyrtong lane ki nongkyrshan jong ki. Ki sngew ba ka pisa ka ai mynsiem ïa ki ban leit ïeng lain ha jaka thep ‘vote’. Ngi lah ban ong ba kane ka dei kaba bakla. Hynrei kata ka shong ha ka jingsngew shimet shimet. Tangba sa shisien pat, ym dei ka pisa kaba lah ban pynjop. Ka pisa ka lah ruh ban pynjot kylla lada la shu shaniah tang ha ka. Na ka 1,000 ngut ki nongthep ‘vote’, khyndiat eh ki ban ïa ‘vote’ shisha ïa uta uba ai pisa. Ki paidbah ki ju ong: Haba ai pisa, shim beit, tangba ïa ka ‘vote’ ngim ai. Kata ka long ka jingshet kylla ïa u nongai pisa. Tangba kumba la kdew haneng, ka pisa ka lah ruh ban pynjot syndon.
Ki samla kiba la biang ïa ka kyrdan pule bad kiba don ïa ka mynsiem shakri, ki duh jingkyrmen haba ki ïohi ïa ka jingsatah ka pisa ha ka por ilekshon. Ki kwah palat ban ïadur ha ka lympung, hynrei namar ka jingbymdon pisa ki salia noh. Kum ïa kine ki samla, ngi dei ban ai jingkyrmen ba kin mih shakhmat ban pan jingkyrshan na ki paidbah. Ïathuh hok beit ba phim don pisa ban thied ïa ka ‘vote’, hynrei phi don ka mynsiem bad ka mon ban shakri katkum ka jingkot bor ka jong phi. Wat kular pat ïa ka bneng namar ki briew ki shalak. Ynda la bun than ki jingkular, ki ngiah noh ban sngap. Kren ïa kiei kiei kiba lah ban long bad ym ïa kiei kiei kiba yn ym lah ban long wat hadien 100 snem ruh. Kren ïa ki jingshisha kumba ki dei.
Nalor ka jingïashim bynta ha ka ilekshon kum ki kyrtong, ki samla ki dei ban ïamih ruh ban trei shitrhem ha ki shnong ki thaw ban pynsngewthuh ïa ki para nongshong shnong ïa ka jingdonkam ban jied ïa ki briew kiba kynsai ban long MLA. Ka kam MLA ka dei kaba kyntang bad kaba khia haduh katta katta. Ki bun ki samla kiba la don ka jingnang ka jingtip bad ki sngewthuh ïa kaei kaba dei bad kaei kaba lait. Ïarap lem ïa ki para nongshong shnong ba kin sngewthuh ïa ki nongrim jong ka jingjied MLA.
Lada phi la rai ban shah thied ha ki kyrtong, tang katta phim don shuh ka hok ban kren eiei pyrshah ïa ki MLA kiba phi la jied. Phi la dep ban buh bynda lypa ïa ka jinglaitluid ha kita kiba ai pisa bad namarkata, phin ym don shuh ka hok ban kdew kti hadien habud. Wat mut ba ka pisa kaba phi shim na ki kyrtong ka dei ban shu ai jingïarap sbun mynsiem. Ka don kaei kaei sha lyndet jong ka jingai bad kata ka long ban thied duh ïa phi naduh khlieh haduh kjat na ka bynta san snem. Ynda la buh bynda na ka bynta san snem, phin ym ïoh wat tang ka lad ban ïakynduh ïa kita kiba la thied ïa phi bad phin hap ban shu im hapdeng ka jingbabe.
