Shillong, Rymphang 11
Ka Drug Reduction, Elimination & Action Mission (DREAM) ka la pynlong ïa ka jingïalang pynsngewthuh paidbah bad ki Village Defence Party (VDP) jong ka sor Shillong ban pynkhlaiñ ïa ki jingpyrshang ba la ïalam da ka imlang-sahlang kum shi bynta ban tehlakam ïa ka jingdih drok.
Ka jingïalang ka pynleit jingmut ha ka ban weng ïa ki jingpeit beiñ bad ban kyntiew ïa ki lad jingïarap lyngba ka imlang-sahlang.
“Ka bynta jong ki VDP ka long kaba kongsan ha ka ban bynrap shuh-shuh nalor ki jingpyrshang jong ki Pulit ka Jylla ha ka ban ïakhun pyrshah ïa u drok,” ong u Mission Director, Bah Francis Kharshiing ha ka kyrwoh ha ka Sngi Balang.
Ka jingïalang ka la pynpaw ruh ïa ka jingdonkam ba kongsan ha ka ban seng ïa ki ïing sumar ba kyrpang hapoh ki shnong ki thaw kum ka bynta kaba kongsan jong ka jingkyrshan ban ïada na ka jingngop biang jong kito kiba la don ha lynti jong ka jingkoit.
“La pynsngewthuh ïa ki dkhot VDP halor ka bynta ba kongsan jong ki ha ka ban ïatreilang bad ki Dorbar Shnong bad ban ïarap pynjai-jai ïa ki jingeh jong ka imlang-sahlang ban ïarap pynsuk ïa ka jingai No Objection Certificate (NOC) na ka bynta kum kine ki jaka,” ong u Bah Francis da kaba bynrap “Shuh shuh, ka jingdonkam jong ka jingai jinghikai la ban jur kum ka lad jingïada ba kongsan ban pynbiang ïa ki kabu lad kamai bad ban pynduna ïa ka jingma ban ngop biang ha ki jingdih pynbuaid.”
Ki bynta ba kongsan jong ka jingïatreilang ba la pynithuh ki kynthup ban kyrshan ïa ki jingtohkit kum ki sakhi ha ki mukotduma ba ïadei bad u drok, ka jingïatreilang bad ki bor pynjari aiñ ha ka por ba ïoh kurup drok bad ka jingshah kem, bad ban pynkhlaiñ ïa ka jingsam jingtip hapdeng ki paidbah bad ki pulit.
Ha kane ka jingïalang la ïoh ruh ïa ka jingkren na u Inspector E. Lamare, OC ka Madanrting Police Station bad u Insp N. Koch, OC ka ANTF Police Station.
Ki dkhot ka VDP na Lawsohtun, Lumparing, Madanrting, Demthring, Mawlai Ïew-Rynghep, Lapalang, Nongthymmai, Mawlynrei Nongkrem, Mawlai Umjaïur, Umpling, Smit Pyllun, Nongrah, nalor kiwei-kiwei, ki la ïashim bynta shitrhem ha kane ka jingïalang.
