Shillong, Rymphang 11
U MLA ka North Shillong u Bah Adelbert Nongrum u la leit ban jurip ïa ki nala ba la dam ha ki bynta jong ka Jail Road, ha kaba u la pynpaw ba u la ïoh jingujor na ki paidbah nongshnong shnong ba ki la mad jingeh ha ka por ba slap.
Ha kane ka jinghiar jurip ïa ki nala pyntuid um la ïadonlang u Executive Engineer ka Public Work Department (PWD), u Sub-Divisional Officer bad ki ophisar ka PWD ha ryngkat u Chairman ka Jail Road Welfare Committee u P Dey bad kiwei. Haba kren sha ki nongthoh khubor u Bah Adelbert u la ïathuh ba ki paidbah nongshong shnong jong ka thaiñ Jail Road ki mad jingeh ha ka por slap namar ka jingbym don ki nala pyntuid um kiba bit ba biang.
Namar kata u la pynpaw ka jingsngewkhia, bad kum u nongmihkhmat u la shimkhia ïa kane ban pynlong ka jingjurip haba ïadei ban tip khambha ïa ka jinglong jingman kitei ki nala um, u la ong ba kane ka nala ka dei kaba sdang naduh najan ka ‘Petrol Pump’ kaba tuid haduh ka ïew die dohkha, kaba ki paidbah ki la mad jingeh mynta la bun snem bha.
U la ong ba ha ki por ba la dep katei ka bynta ka dei kaba la pyrshang ban pynrung ha ka jingpyntrei ka ‘Smart City’ hynrei la kyntait ïa ka jingtyrwa jong u bad mynta u la kyrpad jingïarap napoh ka tnad PWD bad u la pynpaw ba u la dep ban kynduh ïa u Symbud Myntri Rangbah ba dei peit ïa ka tnad PWD ba un shimkhia ïa kane bad u la kyrmen ruh ba shen yn lah ban pynbha ïa kane ka nala khnang ba ha ka por slap ka um kan tuid ha ka rukom kaba dei bad ba kan long ka jingmyntoi ïa ki paidbah nongshong shnong ka Jail Road.
