Shillong, Rymphang 11
U MLA barim ka West Shillong Constituency u Bah Mohendro Rapsang u la mih noh na ka National People’s Party (NPP) da kaba kdew ïa ki daw shimet.
Ha ka shithi ïehnoh kam ba la phah sha u President ka NPP Meghalaya u Bah Prestone Tynsong ha ka 10 tarik Rymphang 2026, u Bah Mohendro u la ong, “Nga phah kane ka shithi ïehnoh kam jong nga kum u dkhot ka NPP namar ki daw shimet”.
U Bah Mohendro u la pynpaw ka jingsngewkmen halor ka jingïoh jong u ban shakri ïa ka party ha kine ki saw snem ba la dep. “Nga sngewnguh shisha ïa ka NPP kaba la ailad ïa nga ban shakri bad ïatreilang ha kine ki saw snem ba la dep,” ong u Bah Mohendro.
Shuh-shuh u la bynrap “Ka jingshemphang bad ka jingkyrshan kaba nga la ïoh ha ka por ba nga ïasyllok bad ka party kan long kaba kordor. Nga shim ïa kane ka kabu ban kitbok kitrwiang ïa ka party riewlum ba kan dang ïai-bteng ban jop ha baroh ki jingpyrshang jong ka ha ki por ban wan.”
U Bah Mohendro u la pynïasoh sha ka NPP shwa ka ilekshon MLA 2023 hadien ba u la shah sospon ha ka Congress namar ba u la ai jingkyrshan ïa ka Sorkar MDA-I. U la ïakhun ïa ka ilekshon da ka tiket ka NPP hynrei u la rem noh ha u Bah Paul Lyngdoh jong ka United Democratic Party (UDP).
Ki tyllong khubor ki ïathuh ba u Bah Mohendro, u lah ban pynïasoh ïalade bad ka Bharatiya Janata Party (BJP) kum ka jingpynkhreh ïa ka ilekshon MLA 2028.
