Shillong, Rymphang 11
U Myntri ka tnad koit ka khiah, u Bah Wailadmiki Shylla u la ïada ïa u Myntri Rangbah ka Jylla, u Conrad K. Sangma, da kaba ong ba kam donkam ïa u ban hiar shuki namarba ka Sorkar Jylla ka la shim ïa ka jingkitkhlieh kaba pura bad ka leh tyngeh ïa kito kiba donkti ha ka jingbthei ba dang shen ha Mynsngat-Thangsko, East Jaiñtia Hills District kaba la shim noh ïa ka jingim jong 31 ngut ki mynsiem briew.
“Ngi shim ïa ka jingkitkhlieh kaba pura halor kane bad ngi la leh da kaba tyngeh ïa baroh kito kiba donkti, kumta ngam tharai ba ka long kaba donkam ïa u Myntri Rangbah ban hiar shuki,” ong u Bah Wailad sha ki nongthoh khubor ha ka Sngi Balang haba jubab ïa ka jingdawa jong ka liang pyrshah na bynta ka jinghiar shuki jong u Myntri Rangbah.
U Myntri u la pdiang sngewbha ruh ïa ka rai jong ka ‘High Court’ ban thung ïa ka jingtohkit kaba laitluid da ka tnad treikam ka Sorkar Pdeng, da kaba ong ba ka Sorkar kam don eiei ban buhrieh.
“Ngim don eiei ban buhrieh. Ngi shimkhia bha ïa kane ka kam bad dei na kata ka daw ba u Myntri Rangbah u la thaw da ka jingtohkit ‘Judicial’ ha kaba nyngkong. (Namarkata), ngi pdiang ïa ka,” u la ong.
U la pyntip ba shen ka Sorkar Jylla kan sa shong bad rai halor ka jingthung ïa u Chairman ka Judicial Inquiry Commission.
“(Ka aiñ) kan sa shim la ka jong ka lynti,” u la ong.
Ha kajuh ka por, u la ban jur ba ka Sorkar ka angnud ban ai ïa ka jingshakri kaba bha tam sha ki paidbah ka Jylla, wat hapdeng jong kane ka jingjia ba sngewsih.
Shuh shuh, u Myntri u la kubur ïa ki jingeh ba ki bor pynïaid ki ïakynduh ha ka ban ïakhun pyrshah ïa ka jingtih dewïong be-aiñ ha Meghalaya, da kaba pynpaw ba katei ka jaka ka long kaba eh ban peitngor.
“Ka jaka ka don sha kyndong bha, hynrei khlem pep, na ka por sha ka por, ngi pyrshang katba lah ha ka kyrdan jong ngi,” la ong u Bah Wailad haba kdew ïa ka jingleit jngoh ba dang shen jong u lem bad u Myntri ka tnad pule-puthi, Bah Lahkmen Rymbui sha katei ka jaka ba jia ka jingjia. U Bah Wailad u la ban jur ba ka Sorkar ka la leh tyngeh ïa kito kiba donkti ha katei ka jingjia ba sngewsih, da kaba bthah ïa u Deputy Commissioner bad u Superintendent of Police ban shim ïa ki lad ki lynti kiba donkam.
“Ngi la kurup bun tylli ki kali, bun bah u dewïong, hynrei kumba phi ïohi hi dalade ba ka jaka ka long kaba eh bad kam long kaba suk ïa ngi ban ong,” u la bynrap.
U Myntri u la pynpaw ruh ka jingsngewlyngngoh halor ka jingtreikam jong ki kam tih par bathymmai ha katei ka thaiñ, da kaba pynpaw ba ka Sorkar hashuwa kam don jingtip eiei halor kine ki kam.
“Baroh shi katta ngi pyrkhat ba une u dei u dewïong uba don hangta bad ki dang pynkit ïa u. Hynrei ngim shym la tip ba ka jingtih par thymmai ka dang jia,” la ong u Bah Wailad. Na ka liang ka Sorkar ka la kem noh ïa ki trai par bad ki nongñiah kali kiba donkti ha ki kam be-aiñ, nalor ka jingshah kem ba dang shen jong 2 ngut kiwei pat.
“Ngin kthong ïa baroh, ngim iehnoh ïano-ïano ruh kiba donkti ha kine ki kam be-aiñ,” la pyntikna u Bah Wailad.
Kumban shu kdew hangne, la pynsangeh noh ïa ka jingwad, ha kaba ka kynhun NDRF bad SDRF ki la kren pynkut ba ym don met ïap shuh hapoh katei ka par, u la bynrap.
