Shillong, Rymphang 12
Ka Director General of Police ka Jylla ka Kong Idashisha Nongrang ha ka sngi Palei ka la thaw ïa ka kynhun tohkit ba kyrpang ka Special Investigation Team (SIT) ban tohkit ïa ka jingbthei bom kaba la pynïap ïa palat 30 ngut ki nongtrei ha ka par dewïong beaiñ kaba don ha Mynsngat-Thangsko, East Jaiñtia Hills District.
“Halor ka jingjia ha katei ka par dewïong kaba dang shen kaba la jia ha Thangsko, East Jaintia Hills District, Khliehriat bad khnang ban pynthikna ïa ka jingtohkit kaba hok, kaba khlem shah liang bad kaba kloi halor ki jingjia kiba la poi sha katei ka jingjia ïap briew, ka DGP, Meghalaya ka sngewkmen ban thaw ïa ka kynhun tohkit kaba kyrpang da ka jingbthah ba kyrpang,” la ong ka Kong Idashisha halor ka jingbthah jong ka.
Ïa kane ka SIT kaba don khyndai ngut ki dkhot yn khlieh da u Dy. Inspector General of Police (ER) u Vivekanand S Rathore.
La bthah ïa ka SIT ban lap ïa ka daw bad ki jingjia kiba la pynlong ïa kane ka jingjia, ban pynlong ïa ka jingtohkit kaba bniah halor ka jingjia tih dewïong ha Thangsko bad ban lap halor ïa ki jingpynkheiñ ïa ka hukum jong ka Ïingkashari/jingbthah jong ka NGT kaba ïadei bad ki kam tih dewïong beaiñ.
“(Ka SIT) kan pynthikna ruh ba ïa ka jingtohkit yn pynlong ha ka por ba la buh khnang ban wanrah ïa ka mukotduma kaba biang bad ban pynthikna ïa ka jingpynpoi ïa ka hok katkum ka aiñ,” ong ka hukum.
Ha ka 09 tarik ka Sorkar Jylla ka la pynsangeh noh ïa ka jingwad bad jingpyllait im ïa ki briew ïoh don kiba dangsahkut halor ka jingbthei ka par dewïong be-aiñ hadien ba ki kynhun bishar bniah ki la pynthikna ba ym lap shuh ïa kiba sahkut hapoh ka par dewïong.
U Myntri Rangbah ka Jylla Meghalaya, u Conrad K Sangma, u la pynbna ruh ban thaw ïa ka Judicial Inquiry Commission ban pynthikna ïa ki jingjia kiba la pynlong ïa katei ka jingbthei.
Ka NGT ka la pynmih ha u snem 2014 ïa ka jingkhang ïa ka jingkit bad jingtih ïa u dewïong ha Meghalaya namar ka jingktah kaba jur ïa ka mariang bad ki jingma kiba khraw kiba wanrah ïa ki nongtih dewïong, da kaba kdew ïa ka jingbym don ki lad jingïada bad ka jingkyrshan.
Ka Sorkar Jylla ka la pynthikna ïa ka High Court ba yn leh da kaba tyngeh ïa kito kiba donkti ban pynïaid ïa katei ka par dewïong beaiñ bad ba la kem saw ngut bad la kurup katto katne hajar metric ton ki jaka bret dewïong beaiñ, katba ki bor synshar district ki dang pynjur ïa ka jingkhynra.
Ka jingsiew bai lutksan na ka bynta ki longïing jong kiba la ngat ha kane ka apot ka dang ïaid katkum ki kyndon jong ka Sorkar.
