Shillong, Rymphang 12
Ka Congress ka la ïaid shaid-shaid haba ïadei bad ka jingpynkhreh ban ïakhun na baroh 29 tylli ki konstitwensi ha kane ka ilekshon ban wan sha ka Garo Hills Autonomous District Council (GHADC).
U khlieh nongïalam ka seng, Bah Vincent H. Pala u la pynbna ruh ba ka seng kan ïaid hi marwei ha kane ka ilekshon khlem ka jingïateh lok badno-badno ruh.
“Ka seng kan ïakhun na baroh 29 tylli ki konstitwensi. Ngim don kano-kano ka jingïateh lok bad kiwei pat ki seng. Ngin ïakhun marwei ha kane ka ilekshon ban wan,” la ong u Bah Pala sha ki nongthoh khubor ha ka Sngi Palei.
U la pyntip ruh ba ka seng ka la pdiang haduh 67 tylli ki aplikeshon haba ïadei bad ki tiket, ha kaba la don kawei kaba la dep ban weng noh bad kawei pat kaba la khmih lynti, kaba sah sa 65 ngut ki kyrtong kiba hap ban pynbeit noh.
“Ngin sa pynbna ïa ki kyrtong ha ka khyllipmat ba ka Sorkar ka pyntip bad pynbna ïa ka ilekshon – kata ka dei ka rukom treikam kaba ju long jong ka seng,” la ong u Bah Pala.
Shuh shuh une u heh Congress u la pynpaw ïa ka jingkyrmen skhem haba ïadei bad ka jingpynkhreh jong ka seng, da kaba ong, “Ngi la pynkhreh (ban ïakhun ïa ka ilekshon). Ki briew jong ngi ki la sdang treikam bad kyrmen ba ngi dei ban leh bha.”
