Shillong, Rymphang 12
Hadien ba ki palat 127 ‘million’ ngut ki nongthep ‘vote’ ki la shim rai mynta ka sngi Palei ban jied ïa ki nongsynshar sha ka Dorbar Parliament ha Bangladesh, lashai ka Sngi Thohdieng, ka Election Commission ka Bangladesh kan ñiew noh ïa ki ‘vote’ naduh ka 7:30 mynstep.
Haba phai mynta ka sngi, u Muhammad Yunus uba dei u nongaibuit ba rangbahduh ka ri Bangladesh uba synshar shipor ïa katei ka ri, u la ong ba mynta ka sngi ka 12 tarik Rymphang, 2026 ka dei ka sngi ban sdang thymmai ïa ka ri Bangladesh.
Kane ka jingpynpaw u Yunus ka dei hadien ba u la ïakren bad ki nongthoh khubor hadien ba u la dep thep ‘vote’ kaba la long mynta ka sngi.
U Yunus u la thep ‘vote’ ha ka jaka thep ‘vote’ jong ka Gulshan Model High School and College ha Dhaka ryngkat ka jingsynran ki bor pahara.
Haba kren sha ki nongthoh khubor hadien ba la dep thep ‘vote’, u Yunus u la ong, “Naduh mynta ka sngi, ngi la ïoh ïa ka lad ban thaw ïa ka Bangladesh ka bathymmai ha man ki kyrdan. To ngin rakhe ïa kane ka sngi kum ka sngi kha baroh shisngi. To ai ba baroh kin rakhe bad pynthikna ban thep ïa ka ‘vote’ jong ki. Ka jingthep ‘vote’ ïa ki kyrtong ka long kaba kongsan jong ka jingkmen na ka bynta ka ri Bangladesh baroh kawei. Ka jingkut jong ka jingphohsniew ba sniew jong ngi bad ka jingsdang jong ka jingphohsniew ka bathymmai.”
Kumban shu pynkynmaw u Yunus, uba la ïalam ïa ka ri Bangladesh, kaba don 170 ‘million’ ngut ki briew, naduh ba ka jingsynshar jong ka Sheikh Hasina, kaba 15 snem, ka la kut ha ka jingshah pynhap shuki jong ka, ha u Nailar 2024, ha kaba u la ong ba u la ïoh pateng ïa ka rukom synshar paidbah bad ka hok kaba la “pra lut” kaba donkam ïa ki jingpynkylla ba pura.
U la ong ba naduh ba u la shimti kum u nongïalam jong ka ri Bangladesh, u la wanrah ïa ka aiñ ba la tyrwa ka kynthup ïa ka jingbuh kyndon ïa ka por treikam jong ki Myntri Rangbahduh, ka jingthaw ïa ka Ïingdorbar ba ha khlieh duh, ka bor synshar President kaba kham khlaiñ bad ka jinglaitluid kaba kham khraw ha ka liang ka bishar.
Nalor ka ilekshon sha ka Ïingdorbar Thawaiñ, ki nongthep ‘vote’ ki dang ïashim bynta ruh ha ka jingthep ‘vote’ ban rai la kin pynskhem ne em ïa katei ka riti synshar. Ka jingthep ‘vote’ ka donkam ïa ka jingbun paid kaba suk ban mynjur bad lada mynjur, kan dang donkam ïa ka jingpynskhem da ka Ïingdorbar thymmai.
U Yunus, uba la khmih lynti ba un hiar shuki hadien ka jingñiew ïa ki ‘vote’ ka ban long lashai ka sngi ka 13 tarik mynta u bnai, uba la kyntiew ïa ka riti synshar kum ka pateng kaba batai ïa ka jingsynshar ba peit ïa u.
Ka jingpoi ki nongthep ‘vote’ baroh kawei ka ri ha Bangladesh ka long 32.88% ha kylleng ki 32,789 tylli ki jaka thep ‘vote’ haduh ka por 12 baje shiteng sngi, la ong u Senior Secretary ka EC, u Akhtar Ahmed.
Watla palat 2,000 ngut ki kyrtong ki don ha ka jingïakhun ha kane ka ilekshon mynta ka sngi, hynrei tang 109 ngut na ki, ki dei ki kynthei.
Ki don palat 127 ‘million’ ngut ki nongthep ‘vote’ ki ban rai ïa ki kyrtong ban phah sha ka Dorbar Parliament ha Bangladesh, namar ïa kane ka ilekshon kaba mynta la pynïaid da ka Sorkar shipor kaba la khlieh da u Muhammad Yunus, uba la ïoh ïa ka khusnam ‘Nobel Peace Prize’, kaba la kular ïa ka ilekshon kaba laitluid, kaba hok bad kaba suk kaba u la shimti ha u bnai Nailar 2024 hadien ba la phet rieh ka Myntri Rangbahduh ka ri Bangladesh, ka Sheik Hasina.
Ha kane ka ilekshon ban jied nongmihkhmat sha ka Dorbar jong ka ri Bangladesh, ka Awami League kaba lamkhmat da ka Sheik Hasina ka la shah khang ban ym ïakhun ïa ka ilekshon.
Ka jingïakhun ïa kane ka ilekshon mynta ka long kaba ïakhaid hapdeng ka BNP bad ka seng Jamaat.
