I. R. Dkhar
Ha u snem ba la dep, ka Sorkar ka dep pynkynriah ïa ki nongdie madan ha Khyndailad (Police Bazar) sha ka jaka jong ka MUDA kaba la dep pynkhreh na ka bynta jong ki.Kane ka jingpynkynriah ka la pynkylluid shibun ïa ka ïaid ka ïeng. Ym tang kata, ka la pynitynnad bha ïa kane ka jaka, ka la pyni-khuid pyni-suba bha ïa ka lynti synkien katkum ka juk mynta. Nalorkata, ka la wanrah ruh ïa ka bha ka miat bad ka jingkoit jingkhiah. Ha u bnai Nailar 21 tarik 2025, la paw na ki Kotkhubor ba hapoh u Naiwieng yn pynkynriah noh ïa baroh ki nongdie madan, kiba shong ha ki surok ne lynti ïaid kjat, kum ha Laitumkhrah, Civil Hospital, Them Bijoy haduh Motphran bad kumta ter ter. Katba ka jingpynkynriah ïa ki nongdie madan na Civil Hospital, Shillong la dep leh, kiwei pat ki jaka, kumba la ong haneng, ym pat lah ban pynkynriah da ka Sorkar haduh mynta. Ngi ai ka jingkhublei bad jingïaroh ïa ki bor Sorkar kaba la lah ban pynkynriah ïa kine ki nongdie madan wat lada la slem ruh.
Kaba pynlyngngoh pat ka long ba ki nongdie madan ha ki bynta jong ka Laitumkhrah, Shillong, ki bor Sorkar kim pat lah ban pynkynriah sha kawei pat ka jaka, kumba la kular. Ngi tip ba ki lynti ïaid kjat (footpath) ha ki bynta jong ka Laitumkhrah, Shillong ka la pynwit shibun ïa ka ïaid ka ïeng. Ym da donkam ban ong, ba ka traffic ruh ha Laitumkhrah ka la pynthud shibun na ka jingdon bad jingpynwit jong kito ki nongdie madan. Kumba ka Sorkar ka ju ong ba kan thaw ïa ki jaka ïeng kali ne ki parking space na ka bynta ka jingsuk bad jingkylluid jong ki kali bad ka ïaid ka ïeng jong ki paidbah, ngim lah ban sngewthuh pat balei ha kane ka thaiñ Laitumkhrah, ym pat lah ban pynkynriah haduh mynta. Lehse, ka don kaei kaei re sha lyndet, kaba ngim lah ban tip.
Katba ngi iohi, mynta kato ka Shopping Complex ha Laitumkhrah, kaba ngi ju ong ka Iew Shyllong, ka la dep, hynrei kaei ka jingeh kaba ym lah ban pynkynriah ïa ki nongdie madan. Hooid ngi don ka jingsngewlem ïa ki nongdie madan namar ki im ja kpoh da ki kam jong ki kaba leh man ka sngi. Ka don shisha ka jingpyrkhat na ka bynta jong ki. Hynrei balei ym lah ban ai jaka ïa ki ha kato ka shopping complex kaba la dep shna mynta ? Ngi tip bad iohi ba katba nang mih ki sngi bad por, ka jingkhapngiah ka nang jur namar ki briew ki nang bun, ki jingleh jingkam, ki jingtrei jingktah ka nang bun khamtam ki kali ki nang bun. Te donkam, namarkata, ïa ki dukan, ki nongdie madan, ki dukan bapher bapher ha ki jaka ba la mang na ka bynta jong ki. Kaei kaba donkam ka long ban don ka plan kaba biang bad kaba iohi jngai na ka bynta ka jingsuk ka leit ka wan, ka trei ka ktah, ka ïaid ka ïeng bad kumta ter ter. Ka la long, shisha, ka jingbym don ka plan ne ka jingiohi jngai jong ki nongïalam ïa ka Jylla jong ngi naduh mynshuwa, hynrei kaei kaba la jia ka la jia bad donkam ban pyrkhat jngai noh mynta na ka bynta ki longdien mandien khnang ba kan don shuh ka jingkynnoh jong kane ka pateng (generation) ka ban wan.
Shuh shuh, ngi kwah ban pynpaw hangne ba shibun kiei kiei ki bor Sorkar ki la khlei ban leh eiei na ka bynta ban lait na ka jingkhapngiah bad ka jingitynnad ka longbriew manbriew jong ka Sor Shillong kum ban shu ong, ka flyover, ka jaka na ka Defence land, ban pynioh biang ïa Garrison Ground, ka jingpynheh ïa ki surok na ka bynta ki kali kiba nang bun bad kiwei kiwei. Khlem pep, ki bor synshar, ki la don ka mang tyngka na ka bynta kine kiei kiei. Hynrei katba ngi iohi, kine ki jingkular bad ki proposal, kim long kam haduh mynta. Ngi iohi pynban, kumba kiba bun ki ong, heh tang ka ktien khlem ka kam.
Namarkata, ngi khmih lynti ba ngin iohi ïa ka jingkylla ka ban pynsuk bad pyn-itynnad ïa ka Sor Shillong na ka bynta ki paidbah bad ka imlang sahlang ha kine ki sngi ban wan.
