Shillong, Rymphang 12
Ka Meghalaya Joint Council of Trade Unions & Associations (MJCTU&A) mynta ka sngi ka 12 tarik u Rymphang 2026 ka la pynlong da ka jingïakhih ba la pynlong da ki 10 tylli ki ‘trade union’ hapoh ka ri ban pyrshah ha kaba ïadei bad ka jingpynkylla ka Sorkar Pdeng ïa ka Labour Law.
Kawei na kine ki aiñ ba la pynkylla ïa ki nongbylla kaba ki pyrshah ka long ba ka Sorkar India ka khot ïa ki kompeni nabar ri ban seng karkhana hynrei ki khñoit ïa ka bai bylla da kaba siew tang shi spah hynñiew phew tyngka bad la shaniah ruh ha ka jingstad ki Sorkar Jylla ban pynkiew bai bylla.
Ha kane ka jingïakhih ki kynthup ïa ki nongtrei bank ka United forum of Bank Unions Meghalaya State Unit nangta ki nongtrei ka BSNL kata ka BSNL Employees Union , ki nongtrei Post Office kiba la shongthait hapoh ka shatri jong ka All India postal and RMS Pentioners Association Meghalaya State Unit bad kiwei-kiwei ki Synjuk.
Ha kane ka jingïakhih kaba jai jai ha syndah u motdur u Woh Kiang Nangbah hajan Civil Hospital Shillong ki nongtrei jong ki union bapher-bapher ki la pyrta ïa ki slogan ban pynpaw ka jingpyrshah ïa ka Sorkar Pdeng .
U Bah Edward Lynshing General Secretary jong ka Meghalaya Joint Council of Trade Unions & Associations (MJCTU&A) u la ong ba ka jingdawa jong ki ka long ban weng ïa ki 4 tylli ki Labour Code ba la wanrah khlem jingïasyllok bad ki Trade Union bad kaba la mynjur ha Parliament ha ka por jong ka khlam Covid-19, kaba kim shym la ailad ïa ka jingïakhih paidbah.
Kiwei ki mat ki kynthup ban weng ïa ka Draft Seed Bill bad Electricity Amendment Bill, ïa ka SHANT Act, ban pynneh biang ïa ka MGNREGA, ban pyndap ïa ki post Sorkar kiba thylli, ban pynlong ‘permanent’ ïa ki Anganwadi, ASHA, MDM worker NHM doctor bad ki nos.
