Khliehriat, Rymphang 12
U District Magistrate ka East Jaiñtia Hills, Khliehriat ha u kyrwoh ba la pyllait ha ka 12 tarik Rymphang u la khang pyrshah ïa kino-kino ki jingpynïadur masi hapoh u pud u sam jong ka distrik baroh kawei.
Haba bteng ban pynjari ïa ka hukum hapoh ka kyndon BNSS/2024/16 kaba 28 tarik Ïaïong 2025, u DM sa shisien pat u pyntip ba la ïoh jingtip ba ki jingpynïadur ki dang ïai bteng ha ki bynta jong ka distrik khamtam ha ka por ba pynlong ïa ki ‘Fete’ bad kiwei-kiwei pat ki tamasa.
U la ong ruh ba ka jingailad ban pynlong ïa kiba kum kine ki jingïakop pynïadur masi ka pynkheiñ ïa ka kyndon 11 jong ka Prevention of Cruelty to Animals Act, 1960, bad ïa ka hukum ba la pynmih da ka Ïingbishar Supreme Court ha u snem 2014 kaba khang pyrshah ïa ki jingpynïadur masi.
Namar ka jingkyrkieh jong ka kam kumta kane ka hukum ka la treikam mardor bad kan bteng ban treikam tad haduh ban da pynmih hukum da kumwei pat.
