Khliehriat, Rymphang 12
Ka jingïap briew ha ka jingbthei jong ka krem dewïong be-aiñ ha Mynsngat-Thangsko, East Jaiñtia Hills ka la kiew sha ka 32 ngut hadien ba 2 ngut ki nongtrei kiba la mynsaw ki la khlad noh na ka jingmynsaw jong ki.
Ki bor pynïaid distrik ki la pyntip ba u Jamil Ahmed Choudhury uba la shah sumar ha Agile Hospital, Beltola, Guwahati, bad u Deb Malakar ba shah sumar ha NEIGRIHMS, Shillong, ki la khlad noh ha ka por ba shah sumar.
Ka jingwad bad jingpyllait im kaba la sdang hadien ka jingbthei ha ka 5 tarik u Rymphang, la pynsangeh noh ha janmiet 9 tarik haka por 5.00 baje hadien ka jingtrei borbah jong ki pulit NDRF, SDRF, Special Rescue Team, ki Pulit bad ki bor synshar distrik.
Ha kajuh ka por, u Magistrate jong ka East Jaiñtia Hills District, u Manish Kumar u la bthah ban pynpra noh ïa ki ‘Crane’ ba la pyndonkam ban hiar sha ki par dewïong bad kiwei pat ki tiar ba la pyndonkam ha ka ban tih dewïong kumjuh ïa ki ïing sher dara na ki par dewïong kiba don ha Mynsngat-Thangsko da kaba kdew ba ka long ka jingma ïa ka jingshngaiñ jong ki paidbah.
Ki bor pynïaid District ka East Jaintia Hills ki la pynjur ïa ka jingkhynra pyrshah ïa ka jingtih dewïong be-aiñ da kaba thung ïa ki kynhun ba kynthup ïa ki Executive Magistrate, ki pulit, ophisar na ka Directorate of Mineral Resources (DMR).
Ha ka jingkhynra ka kynhun ha ka 10 tarik Rymphang, ka la ïoh ban kurup noh haduh kumba 1020 MT u dewïong be-aiñ na surok Sohkymphor, bad 2019 MT na surok Sohkymphor bad Byrwai, kumba 227.78 MT na Sohkymphor, Ïurimkhliehshnong bad 1058 MT harud sarok ka Byrwai bad Ladmynska.
Ha ka 11 tarik Rymphang, la ïoh kurup kumba 432.15 MT ha shnong Ïapmala.
