Shillong, Rymphang 12
U Khlieh nongïalam ka Congress uba dei ruh u MP barim ka Shillong, u Bah Vincent H. Pala, u la kynthoh halor ka rukom khmih bniah jong ka Sorkar Jylla haba ïadei bad ka kam tih dewïong, da kaba ong ba ki seng ha ka liang synshar (ha ka Jylla) ki la khlei ïa ki kular kiba kim shym la lah ban bat.
“Ha kaba ïadei bad ka jingjia kaba dang shen, ngan ym kynnoh ïa ka Sorkar Jylla naba ka jingjia aksiden ka lah ban jia ha kano-kano ka jaka bad ha kano-kano ka por,” ong u Bah Pala sha ki nongthoh khubor ha ka Sngi Palei.
“Ka aksiden ka dei hi ka aksiden. Katba ka jingleh be-aiñ ka dei da kawei pat hi ka bynta,” u la ong haba kdew ïa ka jingbthei jong ka par dewïong ba dang shen ha Mynsngat-Thangsko, kaba la shim ïa ka jingim jong palat 30 ngut ki nongtrei.
Hynrei u Bah Pala u la kynnoh ba ki jingkular jong ki seng ka liang synshar ki la ïalam sha ki kam tih par be-aiñ.
U la kdew ba u Myntri Rangbah ka Jylla, u Conrad K. Sangma uba khmih ruh ïa ka tnad Mining, u la kular ban sdang biang ïa ka jingtih dewïong hapoh hynriew bnai hadien ba wan ha ka bor synshar.
“U Myntri Rangbah, uba bat ruh ïa ka tnad Mining, u la ai ki jingkular ha ka por ka jingïalap ilekshon jong u, ba ka jingtih par kan sa sdang biang hapoh hynriew bnai. Ka ‘Manifesto’ jong ka BJP ka kam ba ka jingtih dewïong kan sdang biang ha Meghalaya hapoh 180 sngi. Ïa kine ki jingkular, la pynpaw biang ha Byndihati bad ha Nongstoiñ, kaba ai jingkyrmen ïa ki briew ba ïa kane ka jingeh yn sa pynbeit noh kloi. Kaba sngewsih ka long ba kine ki jingkular kim shym la urlong, kaba shet kylla ïa ka jingshaniah jong ki paidbah.”
“Ka BJP bad ka NPP kim shym la lah ban pynurlong ïa ki jingkular ba ki la khlei ha ka por ilekshon,” u la bynrap.
U Bah Pala u la ong ba ki jingpyni dak ba khleh lang jong ka Sorkar ki la pynshlur ïa ka jingtih par be-aiñ.
“Ki jingpyni dak ba khleh lang jong ka Sorkar ki la pynkulmar jingmut ïa ki paidbah, khamtam kito kiba shaniah ha ka jingtih dewïong na ka bynta ka lad kamai jong ki. Ka long kaba kongsan ïa ka Sorkar ban pynshai ïa ka nongrim jong ka halor ka jingtih ‘liew khnai bad ban pyntip sha ki paidbah la yn shah ne em ban bteng. Ka jingshisha ba ki jingjia kiba kum kine ki la jia tang ha East Jaiñtia Hills bad khlem kino-kino ki khubor na West Khasi Hills ne Ri-lum Garo, ka pynpaw ïa ka jingdonkam jong ka jingpynshai,” u la ong da kaba bynrap, “Nga kyntu ïa ka Sorkar Jylla ban wanrah ïa ka jingshai khnang ban lait na kum kine ki jingjia hadien-habud.”
