Shillong, Rymphang 12
Ka Voice of the People Party (VPP) Youth Wing hapoh ka jingïalam u Samla Betlumlang Nongbet kum u Vice President, ki la phah kynriah por halor ka jingïa tyngkhuh thoh eksamin ki samla thep kam ha ka DSC bad ka MIDC, ka ban sa long ha ka 14 tarik u Rymphang 2026.
Ka jingkyrduh kam ka dei ka mat kaba buh shisha ïa ki samla ha ka jingeh khamtam hadien ba ki la ïa pyndep ïa ki jingpule bapher-bapher bad kane ka ju wanrah ruh ka jingpynkulmar jingmut ïa ka jingim jong ki.
Kumba long mynta, ki samla ki beh ban ïoh kam kat shaba lait kam, la ka long ha ki ophis Sorkar ne jong ki shimet bad ha kiba don ba em, ki seng la ki jong ki kam bad ha kiba donbor bad don pisa, ki pyrshang da ki lynti bym dei ka long pat ka jingïuhroit ïa ka hok jong kiwei.
Kiba bun ki samla ha kane ka kynti ki la ud la nam halor ka jingïa tyngkhuh jong ka por thoh eksamin jong kito kiba thep kam ha ka DSC, East Khasi Hills District na ka bynta ka post Sweeper bad Cleaner bad kito kiba thep lang ha MIDC ïa ka post Driver.
Ha ka jingpynbna bad ka jingsam ïa ki Admit Card, la shem ba ka DSC ka buh tarik ha ka 14 tarik u Rymphang bad ka por ka long 9 baje haduh 11 baje mynstep bad ka MIDC pat ka buh naduh 10 baje haduh 12 baje shiteng sngi.
Ha ka jingïatyngkhuh ka por thoh eksamin ha kitei ki kam, kiba bun ki la kulmar jingmut kaba la pynlong ïa ka Youth Wing jong ka Voice of the People Party (VPP) hapoh ka jingïalam u Bah Betlumlang Nongbet kum u Vice President ban leit mih sha MIDC ban kyrpad pynkynriah por bad la ïoh ban ïakynduh ïa u MD ka MIDC, u Bah DD Nongmalieh ha ka jingbym don ki ophisar kiba dei khmih ïa ka eksamin.
Ha kane ka jingïakynduh, na ka liang u MD u la kular ïa ka VPP Youth Wing ba un kren ïa ki ophisar ka tnad ba kin pynkynriah noh ïa ka por bad ban buh noh hadien ka 12 baje, khnang ban ai lad ïa ki samla ba kin ïoh thoh eksamin.
Namarkata, ka VPP Youth Wing ka ai khublei ïa une u ophisar bad ban kyntu ruh ïa ki ba ha ki por ban wan, ki dei ban bishar bniah noh khnang ba kum kane ka jingjia kan nym jia shuh.
