Patna, Rymphang:
Ka sorkar Bihar, ka la kyrpad ïa ka sorkar pdeng, ba ka dei ban pyllait ïa ka pisa kaba T.3,000 klur, kaba dang sahteng, katkum ka Pradhan Mantri Awas Yojana-Gramin (PMAY-G), khlem da pynslem shuh, namar ba ka pisa, kaba la thmu na ka bynta ki nongioh jingmyntoi, ka dang sahkut.
Haba jubab ïa ka jingkylli ha ka por kylli jingkylli hapoh ka ïingdorbar, u Myntri ka tnad pynroi nongkyndong u Sharvan Kumar u la ong ba ka sorkar pdeng ka la pyllait T.91 klur ha u bnai Kyllalyngkot, bad ïa katei ka pisa la “sam hapdeng ki nongïoh jingmyntoi na ka PMAY-G khlem ka SNA Account”. U la ong ba ka sorkar jylla haduh mynta ka la mad ïa ki jingeh ban thaw ïa ka Single Nodal Agency (SNA) Account na ka bynta ban sam ïa ka pisa hapoh katei ka skhim.
“Ngi la kyntu ïa ka sorkar pdeng ban pyllait pisa T.3,000 klur, kaba ngi lah ban sam sha ki nongïoh jingmyntoi khlem da don SNA,” u la bynrap.
