Shillong, Rymphang 12
Ka Wah Myntdu kaba don ha West Jaiñtia Hills District, ka dei kawei na ki wah kaba ai umbam umdih ïa ki nongshong shnong hynrei kaba sngewsih ka long ba kane ka wah ka la kylla jngut namar ka jingtheh pathar ïa ki jaboh namar ka jingpyntrei ïa ka surok By Pass.
Lah ban kdew ba ka roi ka par ka dei kaba man la ki shnong ki angnud ban ïoh hynrei ha ka kyrteng jong ka roi ka par kam dei pat ban pynjulor ïa ka mei mariang bad lada ka long kumta, ka long ka jingduhnong kaba khraw ha ka imlang sahlang.
Na ka jingïohi ïa ka jingshah pynjaboh katei ka wah, na ka liang u Bah Khroo L. Pariat, President ka Khooid Ya Ka Wah Myntdu, u la mudui da ka mukotduma ha ka Supreme Bench ka National Green Tribunal (NGT) ban leh ei-ei halor kane ka kam.
Haba kren sha ki lad pathai khubor, na ka liang u Bah Khroo u la ong ba bun napdeng ki nongshong shnong ki dei kiba ïoh ïa ka umbam umdih na katei ka wah bad ka jingshah pynjaboh jong ka, ka la ktah shibun ïa ki.
U la ong ba na ka liang ka NGT ka la pynmih da ka hukum ban thaw da ka Joint Action Committee, ka ban khlieh da u Member Secretary ka Meghalaya State Pollution Control Board nalor kiwei-kiwei bad ban aiti ïa ka kaiphod ha ka 11 tarik u Lber 2026, ha kaba u la pynpaw ba kane ka jingbthah kan treikam naduh mynta.
Nalor kata, u la ong ruh ba ka Sorkar ka wanrah ïa ka roi ka par hynrei ka pynïap ruh da ka roi ka par ïa ki paidbah.
