Shillong, Rymphang 12
Ka Sorkar Pdeng ka la mynjur ban pynjlan sa 6 bnai ïa ka jingshakri ka Kong Idashisha Nongrang kum ka Director General of Police (DGP) ka Jylla.
Ïa ka jingtyrwa kaba la phah da ka Ministry of Home Affairs la ai jingmynjur da ka Appointment Committee jong ka Cabinet, Ministry of Personnel, Public Grievances and Pensions, Department of Personnel and Training ha ka 11 tarik u Rymphang.
Kane ka jingpynjlan ka ailad ïa ka Kong Idashisha Nongrang ban bteng ban trei kum ka DGP ka Meghalaya sa na ka bynta 6 bnai hadien ba ka samoi treikam ka jong ka kan kut noh ha ka 19 tarik u Jymmang 2026.
Ïa kane ka kam la shimkhia kyrpang ha kaba ïa dei bad ka bha ka miat ki paidbah hapoh jong ka Rule 16 (1) jong ka AIS (DCRB) Rules, 1958.
“Ka Appointments Committee jong ka Cabinet ka la mynjur ïa ka jingtyrwa jong ka Ministry of Home Affairs ban pynjlan ïa ka jingshakri jong ka Kong Idashisha Nongrang, IPS (AM:1992), Director General of Police, Meghalaya, sa na ka bynta 6 bnai da kaba pynjynsur ïa ka Rule 16(1) jong ka AIS (DCRB) Rules, 1958, kum ka kam kaba kyrpang na ka bynta ka bha ka miat ki paidbah” la ong u Director Sakshi Mittal ha ka shithi kaba la phah sha u Secretary ka MHA u Govind Mohan.
