Itanagar, Rymphang:
Ka jylla Arunachal Pradesh ka ju pynlong man ka por ïa ki Mock Drill bad ki jingpyntreikam ba bun jait da kaba pynshong nongrim ha ka jingkhynñiuh jumai kaba 7.8 magnitude ban pynkhlaiñ ïa ka jingpynkhreh ïa ki jingjia ba sngewsih, ka jingpynlang ïa ki marpoh khyndew bad ka jingïatreilang hapdeng ki tnad treikam, la ong u Secretary ka State Disaster Management Authority (SDMA) u Dani Sulu.
Haba kren ha ka jingïalang ha ka miej ïakren halor ka jingjia jong ka jingkhie jumai ha kiba bun ki jylla, u Sulu u la ban jur ïa ka jingdonkam ban pynkupbor ïa ki bor pynïaid ïa ki jingjia ba sngewsih ha ki jylla bad ki distrik ban ïalam ha ki jingpyrshang ban ïarap ha ka kyrdan jong ka thaiñ. U la kdew ba ka Arunachal Pradesh ka hap ha ka jaka ba don jingma bha na ka jingkhie jumai, kaba pynlong ïa ki lad jingpynkhreh ba neh bad ka jingpynkhlaiñ ïa ki tnat treikam kiba kongsan bha na ka bynta ka jingpynïaid ïa ki jingjia ba sngewsih.
Ïa kane ka jingpynkhreh la pynlong da ka tnad pynïaid jong ka jylla ryngkat ka jingïatreilang bad ka National Disaster Management Authority (NDMA). Ka la pynleit jingmut ha kaba bishar bniah ïa ki kyrdan jingpynkhreh, ban pynbha ïa ka jingïatreilang hapdeng ki tnad, bad ban pynbha ïa ki lad jingïarap lada jia ba don ka jingkhie jumai kaba jur.
U Senior Consultant ka NDMA u Col Nadeem Arshad (Retd) u la ong ba kane ka jingpyntreikam jong ki bun tylli ki jylla ka long ban pynkhlaiñ ïa ka jingïatreilang bad ka jingpynkhreh, da kaba ban jur ba ki jingjia ba sngewsih kim ithuh ïa ki pud ki sam synshar bad ki donkam ïa ka jingthmu lang bad ka jingtreikam lang ha kylleng ki jylla.
Ha kane ka jingïalang, ki heh jong ka NDMA ki la ai ïa ka jingïathuhkhana kaba bniah shaphang ka jingkhynñiuh jumai kaba pynpaw ïa ka jingdonkam ban shim rai ha ka por kaba biang, ka jingïakren kaba thikna bad ka jingtreikam kaba ïatreilang hapdeng baroh ki nongshim bynta.
