Shillong, Rymphang 12
Ki nongtrei ka Meghalaya Energy Co-operation Limited kiba don ha ka shatri ka Co-ordination Committee of Registerd MeECL Association and Union (CCORMAU) ki la pynlong da ka jingïakhih kaba jai-jai ha phyllaw ka ophis MeECL kaba don ha Lumjingshai, Shillong.
Kane ka jingïakhih jong ki ka long kum shibynta ban kyrshan ïa ka jingïakhih ba shi sngi ka Electrical Employees and Engineer Association ba la khot pynlong ha baroh kawei ka ri India, halor ban pyrshah ïa ka jingaiti ïa ki shlem pynmih bording ka Jylla sha ki kompeni shimet.
Ha kane ka jingïakhih la ïashimbynta lang da ki seng bapher-bapher jong ki nongtrei bording bad ki Engineer, kiba la kynnoh ba kane ka jingpynkylla kan pyntlot ïa ka jingpynïaid ka tnad bording bad kaba sa buh shibun ki jingeh ïa ki paidbah ba pyndonkam bording ha ka Jylla.
Ha ka jingïakhih ki la kyrpad ïa ka Sorkar ba kam dei ban ailad ïa ka bor pynïaid bording ha ki kompeni ne ki riew shimet, ban sangeh ïa ka jingai lisen bun tylli bad kiwei de ki jingdawa kiba la paw ha ki pla kad.
U Bah Bankerlang Nari, Vice President CCORMAU u la pynpaw ba lada wan kine ki kompeni ban pynïaid ïa ka jingsam bording ha ka Jylla kin nym lah ban ai ka jingshakri kaba biang pura bad ka lah ban don ka jingkiew dor ka bai bording, namar kata u la ong, “Ngim kwah ba ki kompeni ki wan shane, ngi kwah ba ka jingpynïaid ïa ka bording kan long ka ban pynïaid da u paidbah, khnang ba ki paidbah kin ym poi ha ka jingeh.”
U la kdew ruh ïa ki Jylla kiba la pyntreikam ïa ka ‘Privatization’ kum ka Chandigarh bad Maharashtra ki mad ïa ka jingkiewdor ka bording, kumta da lei-lei ruh kam lah ban long hapoh ka Jylla bad bynrap ruh ba ka jingïakhun kan ïai-bteng haduh ba ka Sorkar kan weng noh ïa ki polisi ba thmu ban ai sha ki kompeni ne ki riew shimet ïa ka kam pynïaid bording.
