Shillong, Rymphang 12
U National President ka National People’s Party (NPP) uba dei ruh u Myntri Rangbah ka Jylla, u Conrad K Sangma u la pdiang burom ïa u nongïalam riewlum ba pawkhmat, u Daniel Langthasa sha ka seng NPP ha ka jingïalang paidbah kaba la long ha madan Dishru, Mairang ha ka sngi Palei jong ka taïew.
U Daniel u la rung sha ka NPP ha ryngkat ka jingïadonlang ki nongïalam ba rangbah ka seng bad da ki spah ngut ki nongkyrshan, kaba pyni dak ïa kaei kaba ki nongïalam ka NPP ki ñiew kum ka jingpyrshang ba thymmai ban pynkhlaiñ ïa ka seng ha ktem jong ki District Rilum.
Ha kane ka jingïalang la donlang u National Working President ka NPP u James K Sangma, u Vice President u Hemochandra Singh, u Nongseng jong ka Tipra Motha Party u Pradyot Manikya Debbarma, u Myntri Sorkar barim ka Nagaland u Mmhonlumo Kikon ryngkat bad kiwei kiwei ki nongïalam ka seng NPP na kylleng ka thaiñ North East.
Haba pdiang sngewbha ïa u Daniel bad ki nongkyrshan ki jong u sha ka seng, u Conrad u la ong ba kane ka pyni ïa ka jingkiew shaphrang ka NPP ha ka jingïoh jingkyrshan halor ki kam pynroi kiba ka la leh, kaba lamkhmat ruh ha ka ban ïada ïa ka jinglongtynrai ki riewlum bad ïa ka hok jong ki riewlum.
U la banjur ba ka seng ka ïengskhem ha ka ban ai ïa ka roi ka par kaba salonsar ban kyntiew ïa ki lad pynïasoh bad ban pynïar ïa ki lad na ka bynta ki samla ha kylleng ka thaiñ.
U la ban jur ruh ba ka “One Northeast” kaba dei ka jingïohi jngai, ka dei ka jingpynkhlaiñ ïa ka jingïadei hapdeng ki Jylla ban ïatreilang bad ban burom ïa ka kolshor kaba bunjait ka dei kaba kham hakhmat ban pynthikna ba kan donlang ka jingkiew ha ka thaiñ.
Ki nongïalam ka seng ki la ong ba kane ka jingwan pynïasoh kan nang pynkhlaiñ ïa ka seng NPP ha Dima Hasao bad pynpaw ïa ka jingskhem jingmut ba ka seng kan suhthied bad ki jingangnud jong ki shnong ki thaw bad ki nongïalam ha ki shnong.
Ka NPP ka la ai khublei ruh ïa ki paidbah ka Dima Hasao kiba la wan ïa shim bynta ha ka jingïalang bad ka pynpaw ba ka ïengskhem ha ka ban shimkhia ïa ki mat kam pynroi ba kongsan jong ka District.
