Guwahati, Rymphang:
Ka bor synshar jong ka Karbi Anglong ka la pynmih biang sa kawei ka kynhun hukum beh shnong ïa lai ngut ki briew kiba la pynbna kum ki bar ri da ka Foreigners’ Tribunal (FT) ha katei ka distrik.
Kitei ki hukum, kiba la pynmih da u District Commissioner ba dang shu thung thymmai, u Aranyak Saikia, IAS, ha ka 10 tarik Rymphang, 2026, ki bthah ïa kitei ki lai ngut ki briew, ba kin mih noh na ki jaka jong ka Assam bad India hapoh 24 kynta hadien ba ki la ïoh ïa katei ka jingpynbna.
Kine ki briew kiba la paw kyrteng ha katei ka hukum ki long u Md. Tajuddin u khun jong u Md. Abdul Kalam uba shong ba sah ha ka shnong Lengri uba la shah pynbna kum u bar ri ha ka FT Case No. 144/2009 (Reference Case No. 200/2008 na u SSP (B), Karbi Anglong); u Md. Khurshed Ali u khun jong u Late Jubed Ali uba sah ha Dodo Colony u la pynbna kum u bar ri ha ka FT Case No. 239/2008 (Reference Case No. 288/2007); bad u Md. Amir Hussain u khun jong u Late Nur Islam uba shong ba sah ha Tila Basti u la pynbna kum u bar ri ha ka FT Case No. 147/2009 (Reference Case No. 229/2008). Baroh lai ngut ki hap hapoh ka jingpeit jong ki pulit ka Khatkhati Police Station.
Da kaba kdew ïa ka Section 2 jong ka Immigrants (Expulsion from Assam) Act, 1950, ki hukum ki ong ba ka jingbteng jong ki ban don ha India bad Assam ka long kaba ktah ïa ka jingmyntoi jong ki paidbah bad ïa ka jingshngaiñ hapoh ka ri. La bthah ïa ki ba kin mih na kane ka ri lyngba ki lynti khappud Dhubri, Sribhumi (Karimganj), lane South Salmara- Mankachar.
Ka bor synshar ka la maham ba lada jia ba kim kohnguh, yn sa leh ïa kaba biang ban pynbor ban weng noh ïa ki katkum ki kyndon jong ka aiñ.
Ïa ki kopi jong ki hukum beh kam la phah sha u heh pulit, u Karbi Anglong, ban pyntreikam bad ban aiti ïa ki kaiphod jingbud ryntih; u Additional Deputy Commissioner (Revenue) na ka bynta ban kurup ïa kino kino ki mar ki mata kiba lah ban ïaid ne ki bym lah ban ïaid ha ka liang jong ka sorkar; ki Electoral Registration Officers na ka bynta ban pyndam noh ïa ki kyrteng jong ki na ki thup nongthep vote; ka tnad Supply na ka bynta ban pyndam noh ïa ki kard rashon; ka UIDAI na ka bynta ban pyndam ne pynsangeh ïa ki Aadhaar card; bad baroh ki heh tnad distrik ban pynthikna ba la kyntait ïa ki na ki skhim bad ki jingai jingïarap jong ka sorkar.
Kane ka jingleh ka long shi bynta jong ka jingpyntreikam jong ka sorkar Assam ïa ki rai jong ka Foreigners’ Tribunal ha kaba ïadei bad ki nongwan rung be-aiñ ba la pynbna, khamtam ha ki distrik kum ka Karbi Anglong.
Ki hukum beh kam kiba kum kine katkum kane ka aiñ ki la mih ha ka distrik ha kine ki taïew ba la dep.
