Shillong, Rymphang 12
Hadien ka jingbym lap ïa u Kerang Sawkmie, 25 snem ka rta, uba la jah naduh ka 06 tarik u Rymphang, 2026, ïa uba la suba pynïap da ki kñi bad u paralok jong u hi hapdeng ka jingïabuaid ha katei ka sngi, ki bor pulit ka Eastern West Khasi Hills District ha ka 12 tarik u Rymphang, 2026, ki la ïalam ïa kitei baroh lai ngut ban leit kdew ïa ki jaka hajan ka Wah Khapdom.
Ha katei ka sngi, u Kerang u la mih na ïing da kaba ong ban leit bylla thohdieng bad ki kñi bad u paralok jong u hynrei ki la poi shong dih kyiad bad poi sha ka jingïa kynroi bad ïashoh.
Kum ban shu kdew hangne, haba u Kerang um wan phai shuh, ki bahaïing hasem ki la leit kylli na u paralok uba la ïathuh ba ki shong dih kyiad ha katei ka sngi bad ma u pat u wan phet noh sha ïing bad ieh ïa u Kerang bad ki kñi jong u.
La ong ba haba kylli na ki kñi ruh kim shym la ïathuh shai ei-ei bad kane ka la pynlong ïa ki bahaïing ban pyntip sha ki bor pulit ha ka 09 tarik u Rymphang, 2026 bad na ka liang ki pulit ha katei kajuh hi ka sngi ki la hiar sha katei ka jaka ban pynlong ïa ka jingtohkit kaba bniah.
Ki bahaïing ki kam ba ki don ki dak ki shin ha jaka ba ki ïa shongkai ba la don ka jingïa kajia bad ki kam ruh ba ki kñi ki la phla ba ki la pynïap ïa u Kerang bad la bret ruh ïa ka metïap.
Ha ka jingwad ha ki ar sngi ba la dep ym shym la lap satia ïa u bad ha ka jingkdew kiba shah kem la ïoh jingtip ba ki la thang ïa ka metïap jong u Kerang haduh ban da kylla dpei bad sah tang ki shyieng ïa kiba la bret ha ki krem ki kroh katei ka wah.
