New Delhi, Rymphang:
Ka Myntri jong ka tnat pla tyngka ka Nirmala Sitharaman ha ka sngi Balang ka la kyntait ïa ki jingkynnoh ba la wanrah da ki katto katne ki jylla ba la synshar da ka Liang Pyrshah ba ka sorkar pdeng kam pynkylla ïa ka bhah jong ki jylla na ka song khajna ba lah ban ïasam.
Ka Myntri jong ka sorkar pdeng, ha ka jubab jong ka halor ka jingïakren ïa ka mang tyngka ha Lok Sabha, ka la ong ba ka sorkar pdeng ka la pynkylla ïa ka bhah ba pura kaba 41% jong ki khajna ba lah ban ïasam sha ki jylla kumba la bthah da ka Finance Commission.
“Ki jylla ki dei ban peit bniah lada baroh ka Net Proceeds, kaba pynlong ïa ka Divisible Pool, kata kaba weng noh ïa ka Cess bad Surcharge na ka khajna ba pura, ka dei kaba ki ïoh.Ym donkam ban ïakren ïa ka khajna ba pura”, la ong ka Myntri.
Ka Myntri ka la ong ba ka sorkar pdeng ka la mang da T. 25.44 lak klur sha ki jylla ha u snem jong ka mang tyngka 2027. “Kane ka pisa kaba bun kan leit sha ki jylla. Kane ka wanrah ïa ka jingkiew kaba T.2.70 lak klur na ka FY26”, la ong ka Sitharaman.
Haba kynthoh halor ka jingpynkylla ïa ka Cess bad ka Surcharge, ka la pynshai ba ïa kine la lum na ka bynta ka jingthmu bad lada ki jylla ki lah ban wanrah ïa ki jingtyrwa halor ka koit ka khiah, ka pule puthi bad ki surok, kin ïoh ïa ka pisa. “Ka Cess bad ka Surcharge ba la lum da ka sorkar pdeng la ai sha ki jylla na ka bynta ki kam pynroi ha ki bynta bapher bapher. Kane ka long kyrpang na ka 41% ka pisa ba la mang sha ki jylla.”
Haba pynrem ïa ki jingkynnoh ba ka sorkar kam mynjur ïa ki ram sha ki jylla, ka Myntri ka tnat pla tyngka ka la pynpaw ba ka ram baroh ka la kiew da 13.8% ha une u snem mang tyngka ba mynta.
Ka la kdew ba ka jingpynlut ba kongsan ka ïeng ha ka T.12.2 lak klur katba ka jingpynlut ba treikam, kynthup ïa ki jingai jingïarap sha ki jylla, ka long baroh T.17.1 lak klur, kaba long 4.4% na ka GDP.
Ka Myntri ka la ong ba ka sorkar ka la thmu ban pynlut baroh haduh T.53.47 lak klur na ka bynta u snem mang tyngka ban wan, kaba kiew da 7.7% na ka snem mang tyngka kaba mynta kaba kut ha ka 31 tarik u Lber. Katkum ka jingkhmih bniah ha kaba ïadei bad ka jingmang, ka mang tyngka na ka bynta u snem ka kheiñ ka diah jong u 2026 ka la long T. 49.64 lak klur.
