Shillong, Rymphang 13
U Myntri Rangbah ka Jylla Conrad K Sangma ha ka sngi Thohdieng, u la ban jur ïa ka jingdonkam ban thaw ïa ki lad kamai kiba lai phew jait na ka bynta ki samla ka Jylla.
U la pynpaw ïa kane haba plie ïa ka District Emporium ha District Commerce & Industries Centre (DCIC), Williamnagar, kaba dei ka sienjam kaba khraw ban pynkhlain ïa ka sengkam sengjam ki samla ka thaiñ bad ban pynïaid ïew ïa ki tiar thaiñ kti jong ki trai shnong nalor ki mar ba pynmih hi ha East Garo Hills.
U Myntri Rangbah ula pynpaw ba hapdeng 50,000 bad 60,000 ngut ki samla kila rung ha ka jylli trei kam ha Meghalaya manla u snem, katba ki kam Sorkar kiba lait ki don tang hapdeng 1200 haduh 2000 tylli ki shisnem.
Khlem ki sienjam ba lah ban aikam aijam bad kyntiew ïa ka ïoh ka kot, u la maham, kane ka jingïapher ka lah ban wanrah ïa ka jingeh kaba khraw ha ka imlang sahlang bad ka ïoh ka kot.
“Ki plan bad policy jong ngi kin hap ban khmih ïa kane ka jingshisha. Lada ngim lah ban thaw ïa ki lad ki lynti na ka bynta ki samla, kan sa wanrah ïa ka jingtynjuh kaba khraw ha ka ïoh ka kot, ka imlang sahlang bad ka sain pyrthei,” u la ong.
Haba kren halor ka lynti ïaid ka roi ka par jong ki snem ban wan, u la bynrap, “Ka thong jong ngi ïa ka ïoh ka kot ba $10 billion kam dei eh tang halor ka jingkynjoh ïa ka jingkiew shaphrang, hynrei ka long eh ban lah pynïoh ïa ki lad kamai kiba ïai neh lyngba ki kam bapher-bapher kum ka kam jngohkai, ka rep ka riang, ki karkhana bad khaïi pateng bad ka Information Technology. Lada ym don ïa ka thong, ki briew kin sa shu jah rngai”.
U Myntri Rangbah u la kren ruh halor ki projek kiba heh jong ka DCIC kynthup ka Food Processing Unit ba T.25 klur ha Tikrikilla, kaba shalan ïa ki Nokma Ice Cream da kaba pyndonkam ïa ki mar ba pynmih ki nongrep, ka Processing Unit jri ha Songsak ba T.20 klur bad ka karkhana pynpjah bad pyntyrkhong ïa ki marrep ba T.25 klur, ka ban sa pyndep hapoh u Ïaïong-Jymmang, ka ban kyrshan ïa ki nongrep sohtrun, sohñiamtra, bad ka kait ha Ri-lum Garo.
U la ai nuksa ruh ïa ka Ronggara Processing Unit kaba pynmih ïa u A’wang Chips kum u marbam ba pynmih na ki marrep ba mih na ka thaiñ.
U la pynsngew ruh ba kum kine ki emporium dei ban pynkha ha kylleng ka Jylla bad ai jingmut ban ïatehlok bad ki Self Help Group bad ki nongsengkam shimet ba kin pynïaid ïa ki ha ka rukom kaba dei.
“Ka bynta jong ka tnad ka long ban pynwandur ïa ki policy, pyntreikam ïa ki skhim bad ban ai ïa ki jingkyrshan,” u la pynpaw.
Kiwei pat kiba la ai jingkren ki kynthup ïa u Myntri ka PHE Marcuise N Marak bad kiwei kiwei.
