Shillong, Rymphang 13
Ka Hynñiewtrep Integrated Territorial Organisation (HITO) ka dawa ïa u Chief Electoral Officer (CEO) Meghalaya u Dr.B.D.R Tiwari haba ïadei ka jingkhmih bniah ïa ka Special Intensive Revision (SIR) ka ban pyntreikam da ka Election Commission of India.
Haba kren sha ki lad pathai khubor u Bah Donbok Dkhar President HITO u la ong ba ka seng ka la ai jingmut ïa ka Sorkar ba ym dei ban pdiang da ka Aadhaar Card haba uno-uno u briew u ba aplai na ka bynta ban ïoh ïa ka Epic lane ban long nongthep vote. “Ïa ka Aadhaar Card lah ban ïoh da uno-uno uba wan shane bad lada pyndonkam da ka Aadhaar Card ban ïoh ïa ka Epic, ka buh jingma ka jingwan rung u mynder bad u nong Bangladesh bad kiwei.”
Haba phai sha ka jingthoh u Prof. MN Majaw jong u snem 1985, u Bah Donbok u la ban jur ïa ka jingdonkam ban pyntreikam ïa ki nongrim jong ka Accord, da kaba pyndonkam ïa u snem 1966 kum u snem ba pynshong nongrim bad u snem 1971 kum u snem ot kyrteng, ban weng noh ïa ki briew bym dei nongshong shnong ka Ri India na ka thup nongthep vote.
Ka HITO ka kyntu ïa ka jingdonkam ban shim ïa ki lad ki lynti ban ïada ïa ka rukom jied nongmihkhmat hapoh ka Meghalaya bad ai jingmut ban pynduna ïa ka jingpynrung kyrteng bad ym dei ban pynlong ïa ka Aadhaar Card kum ka kot ba donkam eh ban pynshisha ïa ka jinglongtrai nongshong shnong.
Ka HITO ka kyntu ruh ban ithuh ïa ki kot lane ki syrnod jong ki Dorbar Shnong, ki Syiem, ki Nokma, bad jong ki kur kum ki sakhi kiba biang ha ka jingpynshisha, lem bad ka jaka sah kaba pura.
