Shillong, Rymphang 13
Lai ngut ki briew kiba la shah suba jur ba ki lah ban dei ki nongtuh arshaka, ki la shah bat noh ha ki paidbah jong ka shnong Umthli ha ka sngi Thohdieng, kaba hap hapoh ka thanad Pynursla.
Katkum ka kyrwoh khubor na u Superintendent of Police (SP) ka East Khasi Hills la ong ba ki paidbah
ka shnong Umthli ki la pyntip mar mar sha ki pulit ka Pynursla ha ka por kumba 9.30 mynstep hadien ba ki la ïoh bat ïa ki lai ngut ki briew halor ka jingsuba jur ba ki dei ki nongtuh arshaka.
U SP u la ong, kine ki briew kiba la shah bat bad kem noh da ki pulit ki dei kiba kyrteng u Pyndapborlang Khonglah, Bamkerlang Surong bad u Iohborlang Mylliem Umlong.
Kane ka jingïoh kem kala wan ruh hadien ka jingujor jong u Rahul Thapa, uba pyntip ba ka arshaka (YAMAHA MT 15) jong u, kaba don ïa u registration number ML05-AC-4622, kala shah tuh na ka jaka pynïeng kali ka Goenka.
Ïa kane ka case la register hapoh ka thanad Sadar hapoh ka kyndon 305 (b) BNS.
Ki pulit kila ïoh ruh ban kurup ïa ka kali Hyundai i10 ba don u number ML05-Z-5650, ka Maruti Alto 800 ba don u number ML05-N-4146, kawei ka mobile phone Vivo, kawei ka mobile phone Samsung, bad kawei ka mobile phone Poco na ka met jong ki.
Ka jingtohkit mynta ka dang ïaid shakhmat ban lap ïa ka jingdonkti ha kiwei pat ki kam tuh kali arshaka, ong u SP.
