Shillong, Rymphang 13
U dkhot ka Bangladesh Nationalist Party (BNP) Standing Committee u Salahuddin Ahmed u la shah jied biang kum u nongmihkhmat sha ka ïingdorbar ka ri Bangladesh na Cox’s Bazar-1 constituency, kaba hap ha Chittagong district hadien ba la pynbna kum u nongjop ha ka 13 tarik Rymphang 2026.
Kum ban shu pynkynmaw, u Salahuddien Ahmed u dei u nongïalam ka BNP uba ka seng jong u ka shong ha ka liang pyrshah ha ka por ba synshar ka Sorkar jong ka Sheik Hasina hynrei u la shah kem ha Shillong ha u snem 2015.
Une u nongïalam u la lait na Shillong ha u snem 2024 hadien ba ka Sheik Hasina ka la hiar shuki kum ka Myntri Rangbah ka ri Bangladesh.
Katkum ka jingpynbna, u Salahuddin Ahmed u la ïoh 2,22,019 vote. U kyrtong ba ïakhun pyrshah ka Jamaat, u Abdullah Al Faruk, u la ïoh 1,29,728 vote, katba u kyrtong ka Islami Andolan, u Sarwar Alam Kutubi, u la ïoh 4,528 vote.
U Salahuddin u la ong ba u sngew ïa ka jingkitkhlieh kaba khraw bad ka jingkitkhlieh ïa ki paidbah ka konstitwensi jong u kiba la jied ïa u kum u nongmihkhmat jong ki ha ka 13th Jatiya Sangshad.
U la ong ba ha Cox’s Bazar-1, ki nongthep vote kham mynshwa ki la jied ïa ka kurim jong u da ka jingïapher kaba khraw ha ka por ba um don ma u, kaba la nang pynjylliew shuh shuh ïa ka jingsngew kitkhlieh jong u ïa ki paidbah ka thaiñ.
Haba pynpaw ïa ka jingsngewnguh ïa ki paidbah ka Bangladesh, u la ong, “Haba nga don ha ka jingshah pynjah burom, ki briew ki la duwai na ka bynta jong nga, bad ki nongthoh khubor ki la thoh shaphang jong nga. Da ka jingaiei jong U Allah, la jubab ïa ki jingduwai jong phi, bad nga la wanphai biang da ka burom sha ka ri Bangladesh kaba lait na ka jingsynshar donbor.”
Ka Bangladesh Nationalist Party (BNP) ka la jop kput kaba long ar bynta na ka lai bynta ha ka sngi Thohdieng hadien ba la dep ñiew ïa ki vote, hadien shisnem shiteng ka jingmih ka jingkulmar ban dawa pynhap shuki ïa ka Myntri Rangbahduh barim ka Sheikh Hasina ha ka jingïakhih ha u snem 2024.
Ka jingkheiñ kaba thymmai ka la ai ïa ka BNP bad ki paralok jong ka ym duna ïa ka 212 tylli na ki 299 tylli ki shuki, katkum ka khubor ba la ai da ki TV hapoh ka ri Bangladesh. Ka kynhun pyrshah Jamaat-e-Islami bad ki paralok jong ka, ki la jop 70 tylli ki seat ha ka Jatiya Sangsad, lane ka ïingdorbar jong ka ri Bangladesh.
Ka BNP ka la ai khublei ïa ka ri India bad ïa u Myntri Rangbahduh ka ri u Narendra Modi kiba la ithuh ïa ka rai jong ka ilekshon bah jong ka Bangladesh bad kyrmen ba ka jingïadei hapdeng kine ki ar tylli ki ri kan nang khlaiñ hapoh kane ka Sorkar bathymmai. Kum ban shu pynkynmaw u Yunus, uba la ïalam ïa ka ri Bangladesh, kaba don 170 million ngut ki briew, naduh ba la khyllem ka jingsynshar jong ka Sheikh Hasina, kaba 15 snem, ka la kut ha ka jingshah pynhap shuki jong ka, ha u Nailar 2024.
Na ka liang u Yunus uba la synshar shipor ïa ka ri Bangladesh u la lah ban pynlong ïa ka ilekshon sha ka ïingdorbar thawaiñ ka ri Bangladesh ha ka 12 tarik mynta u bnai bad pynbna ïa ki nongjop ha ka 13 tarik Rymphang.
