Shillong, Rymphang 13
U Symbud Myntri Rang-bah ka Jylla u Bah Prestone Tynsong u la kyntait ïa ki jingkynnoh jong u Nongïalam ka Congress u Bah Vincent H Pala ba ka jingbym lah jong ka Sorkar ban pyndep ïa ki jingkular halor ka jingpynbeit ïa ka kam khang dewïong ka la pynkulmar jingmut ïa ki briew.
“Nga sngew ba ka long bakla ban ong ba ki paidbah kila kulmar jingmut. Kam long satia kum-ta,” ong u Bah Prestone.
U Bah Prestone u la kdew ïa ki jingeh ba la buh da ka Nationaliza-tion Act, kaba khmih mynshuwa ïa ki major minerals kum u dewïong bad mawshun ha Meghalaya. “Lym kumta phi donkam ban sngewthuh kawei ba ha katei ka por wat ka Nationalisation Act ka don bad ngi mad ïa ka jingeh kaba khraw bha,” ong u Bah Prestone.
Kane ka aiñ ka ong ba ki marpoh khyndew bala pynlong mar ka ri, kim long shuh kiba lah ban pynïaid ne long trai da mano mano ruh lait noh ka Sorkar India.
U Bah Prestone u la batai ba ka Sorkar MDA ba ïalam da u Myntri Rangbah Conrad K Sangma, kala leit tied ïa ka jingkhang ka ïingbishar Supreme Court ha u snem 2018 ban ïakhun pyrshah ïa ka jingkhang tih dewïong, kaba dei ka tyllong kamai baheh duh ha Jylla.
Ka rai jong ka Supreme Court ka la pynskhem ba ka hok halor ka khyndew ka shyiap bad ki marpoh khyndew ka dei jong ki riew shimet ha Meghalaya.
“Kane ka rai… ka pynskhem biang ba la ka long ha ka sla khyndew ne hapoh khyndew, ka jinglong trai ka leit sha u briew shimet, sha ka kur, sha u Syiem, sha u dolloi ne sha uno uno u riew shimet,” ong u Bah Prestone.
Ka Sorkar mynta ka dang trei ban sdang biang ïa ki kam tih da ki laisen bad ki jingmynjur kiba biang.
U Bah Prestone u la ban jur ba ka Sorkar ka la ju bthah ïa ki bor synshar district ban pynsangeh noh ïa ka jingtih dewïong be-aiñ.
U la pynshong nongrim ïa ka jingeh na ka jingkhang jong ka NGT ha u snem 2014, kaba la ktah ïa ka ïoh ka kot jong ka jylla bad ïa ka kamai kajih jong ki nongshong shnong, khamtam ha ki jaka ba don u dewïong.
“Haba kane ka jingkhang jong ka NGT ka ktah kam ktah tang ïa ki briew kiba duk, ka ktah ruh ïa ki briew ba riewspah kumta ka ktah ïa uwei pa uwei u nongshong shnong ka Jylla,” la ong u Bah Prestone.
