Shillong, Rymphang 13
Ka Executive Member ba dei khmih ïa ka Law & Legal Matters and Town Committee ha Khasi Hills Autonomous District Council (KHADC), ka Kong Deity H Majaw ha ka sngi Thohdieng ka la pyrshah ïa ka jingthmu ban shna ïa ka surok Intermediate Lane na Malki sha Laitkor, da kaba maham ba kane ka projek ka lah ban wanrah ïa ka jingjulor kaba jur ïa ka mariang bad ïa ka imlang sahlang.
Ha ka shithi kaba la phah sha u Executive Engineer, PWD (Roads), Shillong Central Division u S Lytep, ka Kong Deity H Majaw ka la buh ha ka rekod ïa ka jingpyrshah jong ka. Ka la kam ba ka jingpynduna ïa ka jingkhapngiah kali ha Shillong ka long kaba kongsan hynrei ka ong ba ka jingthmu ban pynkylluid ïa ka surok lyngba ka khlaw Malki kan ktah ïa ka jinglong jingman jong ka thaiñ hi baroh kawei.
Ka PWD ka la tyrwa ban “Shna ïa ka surok Intermediate Lane na Malki sha Laitkor (hajan ka Woodland Nursing School), kynthup ïa ka surok kaba pynïasoh ïa ka Lumpyngngad,”. Ka jingjrong ka long kumba 4.586 kilomitar. Katkum ka jingong jong katei ka tnad, katei ka projek ka thmu ban pynduna ïa ka jingdheng kali ha Nongbah Shillong, khamtam ha ki thaiñ Nongthymmai-Laitumkhrah-Dhankheti.
Ha ka shithi kaba kham mynshwa kaba la phah sha u Rangbah Shnong ka Malki, u Executive Engineer jong ka PWD u la pynpaw ba ka tnad ka la jurip ïa ki jaka kiba lah ban long ban pynïasoh ïa ka surok ba thymmai namar ka jingkiew ka jingdheng kali ha Nongbah bad ki jaka ba marjan jong ka. Ka tnad ka la pan ruh ïa ka No Objection Certificate (NOC) ban shimti ïa katei ka projek na ka bynta ka jingmyntoi jong ki paidbah.
Hynrei ka Kong Deity Majaw ka la ong ba ka khlaw Malki ka dei kawei na ki khyndiat tylli kiba dang sah ha Sor Shillong. Ka la kdew ba ïa ka khlaw la pyndonkam bha da ki nongleit kai, ki nongleit jingleit, ki samla pule, ki tymmen bad ki nongïeit ïa ka mariang bad ka don ruh ka bynta kaba kongsan ha kaba pynneh pynsah ïa ka jinglong ka suiñbneng.
Ka la kdew ba ka jinglong jong ka lyer ha Shillong ka la nang sniew ha kine ki snem namar ka jingkiew ka jingtei, ka jingmih lyer jakhlia na ki kali bad ka jingduh noh ïa ki dieng. Ha kum kane ka jinglong jingman, ka la ong ba ka jingpom pathar ïa ka khlaw kan nang pynsniew shuh shuh ïa ka mariang bad ka jingpynneh pynsah ka dei ban long kaba kongsan.
Ka Kong Deity Majaw ka la maham ruh ban long ka jingpeitngor namar ka buh jingma ïa ki nongshong shnong bad ïa ka thaiñ hi baroh kawei.
Shuh shuh ka la pynpaw ba ka khlaw Malki ka long kaba riewspah ha ki jingthung jingtep bad ki mrad ki mreng bad ka dei ka jaka sah jong ki jait sim bad ki jait mrad bapher-bapher, kaba long kum ka jaka rieh tngen jong ki mrad khlaw kiba la shah pynkynriah jaka. Ka la maham ba ka jingshna surok kan pynthut ïa ka leit ka wan jong ki mrad khlaw, kan pynpra ïa ki jaka shong jaka sah bad kan don ka jingma kaba khraw.
Ka Kong Deity Majaw ka la pynkynmaw ïa ki jingjia thang khlaw kiba la dep kiba la pynjulor jur ïa ka mariang bad ktah ïa ki nongshong shnong kiba don marjan.
Kawei pat ka jingsngewkhia kaba kongsan kaba ka Kong Deity Majaw ka pynpaw ka long halor ki jaka lum um jong ka khlaw, kiba pynbiang ïa ka um sha kiba bun ki nongshong shnong jong ka Nongbah Shillong. Ka la ban jur ba kine ki tyllong um ki long kiba kongsan kaba pynbiang ïa ka jingduna um kaba ju jia man ka por ha ka Nongbah bad dei ban ïada ïa ki.
Kumta ka la kyntu ïa ka tnad PWD ban pyrkhat biang bad ban weng noh ïa katei ka jingthmu bad ha ka jaka kata ban wad ïa kiwei pat ki lad ki lynti ki ban ym ktah ïa ka khlaw ne ban pynthut ïa ka jingshngaiñ jong ki paidbah.
