Shillong, Rymphang 13
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh ba dang shen ha nongbah Shillong.
Katkum ka khubor na ki pulit la ong ba u Kenny Kharsyntiew u la ai ka jingujor sha ki pulit ba ha ka 11 tarik mynta u bnai, ki runar bym lah ban ithuh ki la tuh ïa kawei ka laptop kaba shongdor kumba T.45 hajar napoh ka kali kaba don ïa u registration number ML05-Y-7125 kaba dei jong ka kurim jong u, ba la pynïeng ha kawei na ki jaka kaba hap hapoh ka thanad Laitumkhrah.
Ha kawei pat ka khubor, la ong ba ka la don ka jingai jingujor ba ha ka 10 tarik mynta u bnai, ki runar bym lah ban ithuh, ki la prong tuh hapoh ka Gurkha Thakurbari Radha Krishna Mandir kaba don ha Upper Mawprem, Shillong bad ban rah tuh ïa ka iron grinder, wood grinder, cables bad kiwei kiwei ki tiar.
Katba na ka liang jong u Banshanbor Syiemlieh u la ai ka jingujor ba ha ka step jong ka 11 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AE-1499 na ka thaiñ Mawlai Mawtawar, Thapbalieh, Shillong.
