Shillong, Rymphang 13
Ka Hynñiewtrep Youth Council (HYC) bad Jaiñtia National Council (JNC) kum ki seng ba don hapoh ka shatri jong ka CoMSO ki la leit ban ïa shim bynta ha ka jingïalang bad ïaid paidbah ba lah khot pynlong da ki seng bhalang na Garo Hills hapoh ka shatri ba lah tip kum ka Nagrimgimin A-Chik Dol(NAD) ne Unified Garo Organization. Ïa ka CoMSO na Khasi-Jaiñtia Hills la ïalam da u Bah Roy Kupar Synrem kum u Chairman ha ryngkat u Bah Sambormi Lyngdoh, Vice Chairman bad kiwei ki nongïalam ka HYC bad JNC.
Ha kane ka jingïalang paidbah la ïoh ban ai jingkren na ka liang ka CoMSO da u Chairman u Bah Roy Kupar Synrem. Kane ka jingïalang bad ïaid paidbah la khot pynlong halor ka jingshah pynïap jong u wei u dkhot sengbhalang ha kine ki sngi kiba la dep ha ki phetwir nong Bangla, kiba don bynta ha ki kam tih maw beaiñ bad kumjuh ruh ban pyrshah ïa ka jingïashim bynta jong ki briew bym dei ki Riewlum ha ka ilekshon sha ka GHADC.
“Kane ka jingïakhun jong ngi kam shym dei tang mynta ka sngi namar ka jingpang jong ka jaitbynriew A-CHIK ka dei ka jingpang jong ka jaitbynriew Hynñiewtrep. Ka jingduh jong phi ka long ruh ka jingduh jong ngi bad dei na kata ka daw, lada phi ïaleh ngi ruh ngin ïaleh ban ïeng ha syndah bad phi,” la ong u Bah Roy Kupar. U Bah Roy Kupar u la kdew ruh ba “Haba kut jong ka sngi, mano ba dei NPP, mano ba dei Congress, mano ba dei BJP? Hynrei dei ma ngi ki paidbah ba pynlong MLA bad MDC ïa ki.”
Kumta u ong “Ngi dei ban ïengskhem naduh mynta ban pynpaw ïa ka jingpyrshah ïa ki bym dei ki riewlum ban thep vote ha GHADC, namar ha kane ka khyllipmat ba mynta kan rai ïa ka histori jong ki briew ki ban sa shimti kum ki nongïalam ha ki por ban wan”.
