Shillong, Rymphang 13
Ka Sorkar Meghalaya kala wanrah ïa ka jingsiew tulop bala pynbeit ryntih (structured pay framework) na ka bynta ki phew hajar ngut ki Nonghikai, da ka jingthmu ban pynthikna ïa ka rukom siew tulop kaba shai, ka jingshngaiñ ha ka ïoh ka kot, bad ka jingshakri kaba skhem ha baroh ki skul ha Jylla.
Ka jingpynbna, bala pynmih da ka tnad Pule Puthi ha ka 12 tarik Rymphang, ka ong ba kane ka rukom siew tulop ba thymmai kan sdang treikam naduh ka 1 tarik Ïaïong, 2026.
Kane ka tulop thymmai kan treikam ïa ki nonghikai SSA (LP &UP), Nonghikai RMSA (Secondary& Higher Secondary), Nonghikai Adhoc, 4th Teacher (UP), Nonghikai Science & Hindi bad ki Nonghikai Pre-Primary kiba ju shim ïa ka tulop ba la buh beit thik ba kin ïoh (fixed).
Ha kane ka jingpynbeit ba thymmai, ki Nonghikai kin ïoh ïa ka Base Pay bala pynshong nongrim katkum ki snem jong ka jingshakri jong ki, ka Composite Annual Increment (CAI) ba 30% na ka Base Pay, ka Centralised Provident Fund (CPF) bad 8 % ka synñiang na man ki nongaikam bad nongtrei. Ka Increment ba man u snem kan shong ha ka jingbishar ïa ka jingshakri da ki Headmaster, Headmistress lane Principal.
Ha kawei na ki kyndon ba kongsan, ki Nonghikai SSA bad RMSA mynta kin ïoh ïa ka jingpynthikna ba ka jingshakri jong ki kan ïai bteng haduh da kynjoh ïa ka rta ba 58 snem, ka ban shong pat ha ka jinghun ïa ka jingtreikam jong ki bad ka jingkhlain ka met ka phad. Hynrei, ka jingpynbna ka pynshai ba ym dei ban shim ïa kane ka jingpynbteng ïa ka kam kum ka jingpynskhem ïa ka kam lane ai ïa ka kyrdan nongtrei Sorkar.
Ki Nonghikai ha kane ka jingpynbeit, kin ym don hok ban dawa ïa ka jingsiew ba mar katjuh bad ka tulop Sorkar lane ki allowance, bad ki dei ban pyntreikam ïa ka jingïateh kular bad ki bor ba dei khmih.
Ïa ka tulop ki nonghikai SSA, RMSA bad 4th Teacher yn sa pynthep beit beit sha ki Bank Account jong ki shimet shimet. Ïa kiwei pat ki nonghikai, ka jingphah pisa beit beit sha ki ka donkam ïa ka No Objection na ki Managing Committee ki skul.
Ka sorkar ka la bat ruh ïa ka bor ban pynbeit ryntih ïa ki skul bad ka jingpynkynriah kam ïa ki nonghikai ban pynbiang ïa ka jingdon nonghikai bad ka jingdon ki khynnah skul. Ïa kane ka jingpynbna la pynmih da u Vijay Kumar Mantri, Commissioner & Secretary ka tnad Pule Puthi ka Jylla.
