Shillong, Rymphang 13
Ka Embassy ka Nepal ha New Delhi, kala pynpaw ïa ka jingsngewlem halor ka jingïap ki khyndai ngut ki paid Nepali ha ka jingbthei ka par tih dewïong beaiñ ha Mynsngat-Thangsko, East Jaiñtia Hills myn ha ka 5 tarik Rymphang, 2026.
Ha ka kyrwoh, ka Embassy kala pynthikna ba kine ki lanot kila duh ïa la ka jingim ha ka jingbthei bad phah ïa ka jingsngew lem ïa ki longïing kiba shah ktah.
Haduh khyndai ngut ki paid Nepali kila ïap ha kane ka jingjia bad hynñiew ngut kila mynsaw jur bad dang don mynta hapdeng ka jingsumar ha hospital. Ka Embassy kala peit thuh bha ïa ka jinglong jingman ka koit ka khiah jong kine kiba mynsaw bad kitbok ba kin koit noh.
La pyntip ba ka Embassy kala ïatreilang khlem sangeh bad ka Ministry of External Affairs ka Sorkar India bad kumjuh ruh bad ki bor pynïaid District bad ki Pulit, ban pynthikna ïa ka jingsumar kaba biang, bad ka jingai jingïarap ïa ki lanot bad ki longïing jong ki.
Ki longïing kiba kwah ban ïoh ïa ki jingtip lane ki jingïarap ki lah ban phone sha ka Embassy ha u number +91-9205195035.
Katkum ka kyrwoh, ka par dewïong kaba bthei la ong ba ka dei kaba pyntrei beaiñ. Ka Embassy kala maham ba ka jingtrei bylla ha ki par dewïong ba khlem ïoh jingtip bunsien ka ju buh jingeh ban wan ki nongïarap bad buh jingeh eh ban pynïoh ïa ka bailutksan bad kiwei ki jingmyntoi haba don kino kino ki jingjia ki bym lah ban tip lypa.
Haba pynmih ïa ki jingbthah ïa ki paidbah, ka Embassy kala kyntu ïa ki nong Nepal ba kin husiar bha bad ban nym ngop ha ki agent ba tyrwa aikam ha ki jaka ki bym shngaiñ. Ka la bthah ïa ki nongbylla ba kin da pynshisha shuwa ïa ki jingtip shaphang ki nongaikam, ka bai bylla, ki jingmyntoi ba ki ïoh bad ban pyndep ïa baroh ki jingdonkam katkum ka aiñ hashuwa ban pdiang leit bylla.
