New Delhi, Rymphang:
Ka jaka treikam kaba kongsan jong ka tnat shipai suiñ jong ka ri UK, kaba don ka jingkitkhlieh ban pynïar ïa ka pateng ban wan jong ki nongñiah liengsuiñ katei ka ri, kiba pawnam ha ka pyrthei jong ka UK, la ong ba kan ioh ïa ki nonghikai ba tbit na India kiba dei ha katei ka laiñ liengsuiñ.
Kane ka jingpynbna ka long hadien ba la kut noh ka jingïakren jong ki shipai liengsuiñ jong ka UK bad ka India kaba 19 kaba la pynlong hapoh ka nongbah Delhi bad kaba la kut noh syndon ha ka Sngi Palei.
Hapoh kane ka jingiateh kaba dang shen, ka Indian Air Force (IAF) kan phah ïa lai ngut ki nonghikai liengsuiñ kiba tbit sha ka Royal Air Force (RAF) Valley ban hikai ïa ki nongniah liengsuiñ jong ka ri Bilat.
Ka RAF Valley ha Anglesey ka dei ka jaka jong ka skul ai jinghikai liengsuiñ No. Ki nongtrei liengsuiñ ki shah hikai ruh ha RAF Valley na ka bynta ki kam ha ki lum bad ha duriaw ha kylleng ka pyrthei. Kane ka dei ka sien kaba nyngkong ba ki nonghikai liengsuiñ jong ka ri India kin ai jinghikai ïa ki nongniah liengsuiñ jong ka ri Bilat ha RAF Valley ban pynher ïa ki liengsuiñ ïapom. Ka jingpynbna ïa ka IAF kan long na ka bynta ar snem ha kaba sdang, la ong ka kyrwoh. Ki nonghikai liengsuiñ jong ka IAF kin ai jinghikai ïa ki nongniah liengsuiñ jong ka RAF ha ki liengsuiñ BAE Hawk T2 lane Texan T1. Ka India ka pynher ruh ïa ka Hawk kum ka liengsuiñ hikai ba kongsan jong ka. Ka Hindustan Aeronautics Ltd ka shna ïa kane ka trainer hapoh ka laisen na ka BAE Systems. Ki nonghikai liengsuiñ kin dang don hapoh ka jingpyniaid jong ka IAF katba ki dang trei na ka bynta ki nongialam jong ka RAF ha ki kam hikai, la ong ka kyrwoh.
“Ka jingsoi ïa kane ka Shithi jingiateh ka dei ka sienjam kaba kongsan ban pynskhem ïa ka jingiadei kaba la slem bha hapdeng ka tnat shipai suin jong ka ri India. Ka jingwanrah ïa ki QFI jong ka India sha ki UK Military Flying Training Systems ka pynjylliew ïa ka jingiatreilang jong ngi, ka pynbha ïa ka jingiatreilang bad ka pynskhem ïa ka jingkular lang jong ngi ban nang kiew shaphrang,” U Assistant heh jong ki shipai suin, u la ong.
