Guwahati, Rymphang 15
Ka Sorkar Pdeng ka la ai bor ban wanrah dohkha na Bangladesh lyngba ka Dawki Land Port (DLP), ka jingleh kaba la khmih lynti ba kan pynkylla ïa ka rukom pynpoi ïa ki dohkha kiba bha bad ba dang shu sei na um jong ka thaiñ da kaba pynbha ïa ka jingdon bad kaba lah ban pynduna ïa ka dor dohkha.
Haba pynthikna ïa kane ka kam, u TC Chacko uba dei u Regional Coordinator (Dawki) jong ka Land Port Authority of India u la ong ba la pyndep ïa ki jingmynjur bad ki kot ki sla kiba donkam. U la kdew ba ki bor synshar mynta ki dang ap ïa ki nongwanrah mar na India ban pyndonkam ïa kane ka jaka, da kaba batai ïa ka jingpynlait kum ka sienjam kaba kongsan na ka bynta ka khaïi pateng shabar pud.
Ki heh Sorkar ki la pynpaw ba baroh ki jait dohkha lah ban wanrah lyngba ka Land Customs Station, lait noh tang ki dohkha ba im bad ki dohkha hilsa. Ka Bangladesh, ki la kdew, ba ka dang bteng ban khang ïa ka jingshalan ïa ka dohkha hilsa sha India ban pyndap ïa ka jingdawa hapoh ka ri, da kaba ailad ban shalan tang ha ki por lehkmen ba la jied.
U Chacko u la pynpaw ïa ka jingngeit skhem ba shisien ba ki nongwanrah mar ki sdang ban treikam, ki nongthied nongpet ha Shillong, Guwahati bad ha kiwei kiwei ki bynta jong ka thaiñ Shatei Lam-Mihngi ki lah ban ïoh jingmyntoi na ka dor kaba kham ïakhun bad u la bynrap ba ki nongkhaïi ha Bangladesh ki la sngewhun shi katdei eh ïa kane ka rai.
Kumba ka long mynta, ka dohkha kaba bun ba la bam ha ka thaiñ shatei lam-mihngi ka dei kaba la wanrah na Andhra Pradesh, ha kaba tang khyndiat eh la wan poi na Bangladesh lyngba ka Agartala land custom station. Ka por ïaid kaba kham jrong – kaba ju long ar ne lai sngi na Andhra Pradesh bad jan shisngi na Agartala bunsien ka ktah ïa ka jinglut bad ka jinglong thymmai (fresh) jong ki dohkha.
Haba ïanujor, la khmih lynti ba ka lynti na Dawki kan pynlyngkot shibun ïa ka por pynpoi mar. U Chacko u la ïohi ba ki jingkit ki lah ban poi sha Shillong, kaba jngai kumba 84 km, hapoh kumba lai kynta, bad sha Guwahati ban tam sa da ar ne lai kynta. Ka jingduna ka jinglut jingsep ha ka leit ka wan, u la ai jingmut, ba ka lah ban ïarap ban pynhiar dor katba ka ïarap ban pynneh ïa ka jinglong thymmai jong ka dohkha.
U la pynpaw ruh ïa ka jingmyntoi jong ka jinglong, da kaba kdew ba ki dohkha kiba rung lyngba ka Dawki kin hap ha ka jingpeit bniah man ka por. Kane ka shim ïa ka jingkordor, u la ong, haba kheiñ ba ki nuksa dohkha ha ki ïew jong ka thaiñ shatei lam-mihngi, ha ki katto katne ki khep, la lap ba ki don ïa ka dawai formaldehyde, ka dawai kaba shyrkhei kaba pyndonkam na ka bynta ban pynneh pynsah thymmai ïa ki dohkha.
Ki bor pynïaid ki la pyni ba ki khmih lynti ïa ka jingïashim bynta na ki nongwanrah mar na Assam bad Meghalaya, da ka jingthmu ban pynthikna ïa ka jingpynbiang kaba kham bha, ka jinglah ban siew bad ka jingshngaiñ na ka bynta ki nongthied ha kylleng ka thaiñ.
