Washington, Rymphang:
U President ka United States, u Donald Trump, ha ka Sngi Palei u la maham pyrshah ia ka Iran ba ka US kan pyni da ka bor bad kban ai da ka jingsneng kaba tyngeh ia ka Iran lada kam lah ban iamynjur ia ki jingiateh ‘Nuclear’ bad ka US. Hynrei na ka liang u Myntri Rangbahduh ka Israel, u Benjamin Netanyahu, u la ong ba um sngew tikna ia katei ka jingiateh kular hapdeng ka Iran bad ka US kumba la pynbna da ka US.
Haba ai jingkren ha ka sngi ba bud ba u la pdiang burom ïa u Netanyahu sha ka iing White House, u Trump u la ong ba u kyrmen ban ïoh ïa ka jingmih “hapoh ka taiew ban wan” na ka jingïakren jong ka Washington bad ka Tehran halor ka prokram nuclear jong ka.
“Ngi hap ban iateh, lym kumta kan long kaba sngewsih shibun, kaba sngewsih shibun. Ngam kwah ba kan jia kumta, hynrei ngi hap ban iateh”, la ong u Trump ha ki nongthoh khubor.
“Kane kan long kaba sngewsih shibun ia ka Iran lada kim lah ban iasoi.”
U Trump — uba dang pyrkhat ban phah ia ka liengsuin kit liengsuin kaba ar sha Middle East ban pynbor ia ka Iran — u la pynkynmaw ia ki jinghiar thma jong ki shipai jong ka US kiba u la hukum ia ki jaka shna nuclear jong ka Tehran ha ka por ba ka Israel ka ialeh thma 12 sngi bad ka Iran ha u bnai Jylliew jong u snem ba la dep.
“Ngin sa peit lada ngi lah ban ioh ia ka jingiateh bad ki, bad lada ngim lah, ngin hap ban leit sha ka bynta kaba ar. Ka bynta kaba ar kan long kaba eh bha na ka bynta jong ki”, la ong u Trump.
U Netanyahu u la leit sha Washington ban pynbor ïa u Trump ban shim ïa ka lynti kaba kham tyngeh ha ka jingïakren nuclear jong ka Iran, khamtam eh ha kaba ïadei bad ka jingpynrung ïa ki tiar thma jong ka Islamic Republic jong ki namding Ballistic missile.
Hynrei kumba ka paw ki nongïalam jong ka Israel bad US ki dang don ha ka jingïapher jingmut, ha kaba u Trump u la ong hadien ka jingïakynduh jong ki ha White House ha ka sngi thohdieng ba u la ban jur ba ka jingïakren ka dei ban bteng beit.
