Shillong, Rymphang 15
Kawei ka jingjia kaba jia kaba sngewsih, ha kaba ar ngut ki briew kiba dei ki shi kmie shi khun ki la khlad ha shen hadien ba ka Maruti Alto kaba ki shong ka la leit tynrah jubor nadien ïa ka trok ha National Highway 6 ha Mawdiangum, Ri Bhoi District.
Na ka jingïoh lum khubor na ki bor pulit, kaba ki lad pathai khubor ki la dep ban pyni ïa ka khubor, la ong ba la ñiah ïa ka Maruti Alto kaba don ïa u Registration Number ML 05 Y 4464 da u Bah Khem Nongrum, 66 snem ka rta bad ki tei ki shi kmie shi khun kiba ïap ha shen ki dei ka kurim jong u, ka kong Lucia Nongsiej, 45 snem ka rta bad ka khun jong u, ka Ridahun Nongsiej, ba 21 snem ka rta.
Ha kane ka kali la don lang ruh i khyllung kynthei ba dang 2 snem ka rta, iba dei i khun jong ka Kong Ridahun.
Shuh shuh la ïathuh ba kine ki dang wan da katei ka Maruti Alto na Umsamlem ban leit phai sha ïing sha 20 Mer, hynrei mar ïa poi ha Mawdiangum hajan ka Bajaj Showroom ka la leit tynrah pynban ïa ka trok kaba don ïa u Registration Number AS 01 RC 5327, kaba ïeng kham harud surok ban bujli shaka.
Kine kiba khlad, ki shi kmie shi khun ki la khlad hashuwa ban poi ha Civil Hospital Nongpoh bad ïa kane la pyntip da ki Doctor.
Ha ka jingbuddien bad kane ka jingjia namar kiba bun ki paidbah ki kwah ban tip, katei ka trok kadei kaba kit aïu bad haba leit sha ka jaka kaba pynïeng ïa katei ka trok kaba tap tarpal kata ha ka jaka ba ju pynïeng kali jong ka Nongpoh Police Station, watla ym lah ban kiew ban khyllied ïa ka tarpal hynrei la lah ban ïoh ban peit thuh ïa ka trok.
Ha ka jingwad ban pynshisha tang da ka peit ïa ki sawdong sawkun jong ka trok, la lah ban ïohi ba ki don ki dewïong bad la suba ba katei ka trok kadei kaba kit ïa u dewïong.
Haba wad jingtip pat halor katei ka case, la ïoh jingtip ba mynta ka don ha ka Iingkashari.
