Gangtok, Rymphang:
Ar tylli ki jingjia jong ki jingthoh ba la mih na ki Cyber kiba la jia hala kijong kijong ki jaka, kumba la ïoh jingtip, kiba na Pakyong ha Sikkim, kaba pynpaw ïa ka jingma kaba nang kiew jong ki jingleh thok online kiba thmu ïa ki nongshong shnong ki bym tip ei ei.
Ki jingjia, kiba la buh jingthoh hapoh ka jingpeit jong ki pulit CID, ki la pynlong ïa ka jingduhnong kaba la lum lang, kaba la kot palat T. 1.3 lak.
Katkum ki tyllong khubor na ki pulit, ka jingjia kaba nyngkong eh ka dei ha ka 8 tarik u Rymphang, ha kaba uwei u lanot uba la ngat ha ka apot u la hap ha ka jingtyrwa kam thok kaba “trei na ïing” kaba la pynphriang lyngba ka lad pathai khubor.
Hadien ba u la klik ha ka link jong ka kam, la bthah ïa u ban siew ïa ka bai pynrung kyrteng kaba rit bad ha kaba sdang la ai jingkheiñ ïa u da ka jingmyntoi kaba rit ynda u la pyndep ïa ka kam pynrung, ka buit kaba paw ban ïoh ïa ka jingshaniah.
Da ka jingpynshlur na ka jingwanphai kaba nyngkong, la bthah ïa u lanot ban thep ïa ka pisa kaba kham heh ban shim ïa ka kam kaba ar.
Kham hadien ba la phah ïa ka pisa, une u briew u la ïoh ïa ka phone na ki nongleh thok kiba pynshisha ba ka pisa kaba u phah kam shym la treikam bad dawa ban siew biang. Hynrei haba peit ïa ka histori jong ka jingphah pisa lyngba ka aplikeshon Digital Wallet, une u briew u la lap ba ka jingsiew ka la dep ban ïaid beit kumba ka dei ban long, kane ka la pynpei phang ïa u ba ka dei ka kam leh thok. Ka jingduhnong baroh ha kane ka khep ka long T.6,956.
Ha ka jingjia kaba ar, uwei pat u lanot, u la ïoh ïa ka khubor lyngba ka message na uwei u briew uba la kam ba un pynsuk ïa ka jingpynbeit ïa ki nongtrei.
Utei u nongleh thok u la pan jingsiew bunsien da kaba kdew ïa ki jinglut kum ka bai leit bai wan, ka bai bam, bad wat ka jingkynnoh ba la kem ïa ki nongtrei da ki bor pynïaid rel.
Ban ai jingshaniah, la sam ïa ki dur kiba ïalam bakla ïa u lanot.
Hadien ba u la leh katto katne ki jingkhaïi kiba kot sha ka T.1,24,220, une uba la shah thok, u la pynshisha ïa ki jingkynnoh bad ki heh jong ka rel bad lap ba kam shym la don kum kata ka jingshah kem, kaba pynshisha ïa ka jingleh thok jong ka jingkhaïi.
Ki pulit ki la sdang ïa ka jingtohkit ha baroh ar tylli ki khep bad ki la kyntu ïa ki paidbah ba kin long kiba husiar pyrshah ïa ki jingtyrwa kam khlem da pan bad ki jingkyrpad kiba ïadei bad ka jingshakri ha ki Social Media bad ki jaka phah khubor.
